पनवेल शहराची पाणी चिंता मिटली… देह रंग धरण भरून वाहू लागले

देहरंग धरणाची पाणीसाठा क्षमता ३.१२५ घनलक्ष मीटर आहे. पनवेल शहरातील नागरिकांच्या पिण्याच्या पाण्याची गरज भागविण्यासाठी या धरणाचा उपयोग केला जातो. मात्र, वाढत्या लोकसंख्येमुळे धरणातील पाणीसाठा अपुरा पडू लागल्याने पनवेल महापालिकेला महाराष्ट्र जीवन प्राधिकरण (एमजेपी) आणि महाराष्ट्र औद्योगिक विकास महामंडळ (एमआयडीसी) यांच्याकडून अतिरिक्त पाणी घ्यावे लागत आहे.

या धरणातून दररोज सुमारे १६ दशलक्ष लिटर (एमएलडी) पाणी उपसा केला जात​ होता. मागील महिनाभर धरणातील पाणीसाठा संपुष्टात आल्याने धरणक्षेत्र कोरडे पडले. त्यामुळे पाणीपुरवठ्याचे नियोजन करताना महापालिकेला विशेष उपाययोजना कराव्या लागल्या होत्या.

सध्या धरणात आलेल्या पाण्यामध्ये मातीच्या गाळाचे प्रमाण अधिक असल्याने सांडव्यावरील दरवाजे बंद करण्यात आलेले नाहीत. गाळयुक्त पाणी वाहून जाऊन स्वच्छ पाणी धरणात साठावे,​ असे महापालिकेचे प्रयत्न सुरू आहेत. ​आणखी समाधानकारक पाऊस झाल्यानंतर धरणात पाणीसाठा करण्याची प्रक्रिया सुरू करण्यात येणार असल्याचेही त्यांनी स्पष्ट केले. मे महिन्यात धरणातील अपुरा पाणीसाठा आणि एल निनोच्या प्रभावामुळे राज्य शासनाच्या सूचनेनुसार पाण्याचा अपव्यय टाळण्यासाठी पनवेल महापालिकेने आठवड्यातून एक दिवस पाणीपुरवठा बंद ठेवण्याचे नियोजन केले होते. आता धरणाच्या सांडव्यावरून पाणी वाहू लागल्याने शहराच्या पाणीपुरवठ्याबाबत काही प्रमाणात दिलासा मिळण्याची अपेक्षा व्यक्त होत आहे.