पनवेल रेल्वेस्थानकाबाहेर पोलिसांनी मध्यरात्री सापळा रचून मुंबईच्या तरुणाकडून केला ९ लाखांचा गांजा जप्त

बुधवारी मध्यरात्री सुमारे दोनच्या सुमारास पनवेल शहर पोलिसांना रेल्वेस्थानक परिसरात गांज्याची तस्करी होणार असल्याची गोपनीय माहिती मिळाली होती. त्यानंतर वरिष्ठ पोलीस निरीक्षक बाळा कुंभार यांनी विशेष पथकाला सापळा रचण्याचे आदेश दिले.

पोलीस उपनिरीक्षक दत्तात्रय देवकते यांच्या नेतृत्वाखाली पोलीस शिपाई दत्ता जाधव, साई मोकल, किरण कराड तसेच हवालदार नितीन खऱात आणि बोरसे यांच्या पथकाने रेल्वेस्थानकाबाहेरील सूर्या लॉजकडे जाणाऱ्या रस्त्यावर सापळा रचला. दरम्यान, दोन तरुण निळ्या रंगाच्या पिशव्या घेऊन येताना दिसले. पोलिसांची चाहूल लागताच त्यांपैकी एकाने पळ काढला, तर दुसऱ्या तरुणाला पिशवीसह ताब्यात घेण्यात आले.

चौकशीत अटक करण्यात आलेला तरुण मुंबईतील खार परिसरातील जवाहर नगर येथील टोपीवाला चाळीत राहणारा असल्याचे निष्पन्न झाले. त्याच्याकडील पिशवीची तपासणी केली असता त्यामध्ये १८ किलो ८० ग्रॅम गांजा आढळून आला. जप्त करण्यात आलेल्या अमली पदार्थाची किंमत सुमारे नऊ लाख २२ हजार ८० रुपये असल्याचे पोलिसांनी सांगितले.

प्राथमिक चौकशीत हा गांजा मुंबईत तस्करीसाठी नेण्यात येणार असल्याची माहिती समोर आली आहे. तसेच हा गांजा पनवेलमध्ये कोणाकडून आणण्यात आला, याचा तपास सुरू असून फरार आरोपीचा शोध घेण्यासाठी पोलीस पथके रवाना करण्यात आली आहेत. दोन दिवसांपूर्वी पनवेल शहर पोलीस ठाण्याचा पदभार स्विकारलेल्या वरिष्ठ पोलीस निरीक्षक कुंभार यांची ही पनवेलमधील पहिलीच कार्यवाही आहे.