३ वर्षांच्या विलंबानंतर कौशल्य विकास विद्यापीठाला गती

२७ मार्च २०२३ रोजी पनवेलमधील आयटीआय इमारतीच्या जागेवर रतन टाटा महाराष्ट्र राज्य कौशल्य विकास विद्यापीठाच्या इमारतीचे भूमिपूजन राज्यपाल रमेश बैस आणि तत्कालीन मुख्यमंत्री देवेंद्र फडणवीस यांच्या हस्ते झाले. मात्र, निविदा प्रक्रियेत उद्भवलेल्या तांत्रिक अडचणी, प्रशासकीय मंजुरीचा विलंब आणि कार्यादेश देण्यास लागलेले तब्बल ३५ महिने यामुळे या प्रकल्पाचे काम रखडले. काही दिवसांपूर्वी सार्वजनिक बांधकाम विभागाने अखेर कंत्राटदार कंपनीला कार्यादेश दिल्यानंतर प्रत्यक्ष बांधकामाला सुरुवात झाली आहे.

हा प्रकल्प पनवेल​ शहरातील आयटीआयच्या ​१७.५० एकर भूखंडावर साकारला जाणार असून एकूण बांधकाम क्षेत्रफळ ५४,८०९ चौरस मीटर इतके आहे. या संयुक्त संकुलामध्ये प्रशासकीय इमारत, औद्योगिक प्रशिक्षण संस्था, शैक्षणिक संकुल ब्लॉक, तसेच ग्रंथालय, वाचनालय व सेमिनार हॉलचा समावेश असणार आहे. प्रशासकीय इमारत ४,६५१ चौ.मी., आयटीआय इमारत १६,७६५ चौ.मी., शैक्षणिक ब्लॉक २७,६२३ चौ.मी. आणि ग्रंथालय व सेमिनार हॉल ५,७७० चौ.मी. क्षेत्रफळात उभारण्यात येणार आहे. विविध इमारतींची उंची २२ ते ३४ मीटर दरम्यान असणार असून चटई क्षेत्र निर्देशांक १.५ आहे.

हा प्रकल्प दोन टप्प्यांत राबवण्यात येणार आहे. एकूण ७५२.६६ कोटी रुपयांचे अंदाजपत्रक शासनाकडे सादर करण्यात आले होते. त्यापैकी २९ एप्रिल २०२५ रोजी ४३१.८० कोटी रुपयांची प्रशासकीय मंजुरी मिळाल्यानंतर हा प्रकल्प सार्वजनिक बांधकाम विभागाकडे हस्तांतरित करण्यात आला. अलीकडेच १३ फेब्रुवारी रोजी विद्यापीठाच्या कार्यालयीन बांधकामासाठी २ कोटी २१ लाख रुपयांची वित्तीय मंजुरी देण्यात आली आहे.

या प्रकल्पाचे स्थापत्य व विद्युत तांत्रिक मान्यतेचे काम पूर्ण झाले असून टाटा कन्सल्टिंग इंजिनिअर्स लिमिटेड यांची प्रकल्प सल्लागार म्हणून नियुक्ती करण्यात आली आहे. दोन वर्षांत काम पूर्ण करण्याचे उद्दिष्ट ठेवण्यात आले आहे. सध्या कार्यारंभ आदेश देण्यात आले असून​ भूमिपूजनानंतर प्रत्यक्ष बांधका​माच्या सुरू​वातीला लागलेल्या विलंबानंतर का होईना, पण पनवेलला कौशल्य विकासाच्या दृष्टीने महत्त्वाचे शैक्षणिक केंद्र मिळण्याचा मार्ग अखेर मोकळा झाला आहे.