मुंबई कृषी उत्पन्न बाजार समितीचे सचिव शरद जरे यांच्याकडे पणन संचालक पदाचा अतिरिक्त कार्यभार

पणन संचालक पदावर यापूर्वी संजय कदम कार्यरत होते. त्यांच्या जागी जरे यांच्याकडे ही जबाबदारी सोपवण्यात आली आहे. शासनाने यापूर्वीची स्थानिक कार्यव्यवस्था रद्द करून नव्याने आदेश काढला आहे. ७ एप्रिलपासून हा आदेश लागू झाला असून पुढील आदेश येईपर्यंत जरे हेच या पदाचा कार्यभार सांभाळणार आहेत. उपसचिव नितीन गायकवाड यांनी राज्यपालांच्या आदेशानुसार हा शासनादेश जारी केला आहे.

मुंबई कृषी उत्पन्न बाजार समितीत सचिव म्हणून कार्यभार स्वीकारल्यानंतर जरे यांनी अनेक गैरव्यवहारांवर कारवाई करत प्रशासनात शिस्त आणण्याचा प्रयत्न केला होता. बाजार समितीतील आर्थिक व प्रशासकीय अनियमिततेविरोधात त्यांनी घेतलेल्या कठोर भूमिकेची दखल शासनस्तरावर घेण्यात आल्याचे सांगितले जाते. त्यांच्या कडक आणि शिस्तबद्ध कामकाजाच्या पार्श्वभूमीवरच ही अतिरिक्त जबाबदारी त्यांच्यावर सोपवण्यात आल्याची चर्चा आहे.

दरम्यान, या निर्णयामुळे राज्यातील विविध कृषी उत्पन्न बाजार समित्यांमध्ये काही प्रमाणात अस्वस्थता निर्माण झाल्याचे बोलले जात आहे. सहा महसूल विभागांतून मुंबईत येणाऱ्या शेतकरी प्रतिनिधी तसेच बाजार समिती संचालकांमध्ये या बदलाबाबत चर्चांना उधाण आले आहे. जरे यांच्या कार्यपद्धतीमुळे बाजार समित्यांवरील नियंत्रण अधिक कडक होण्याची शक्यता व्यक्त केली जात आहे.

या बदलाच्या पार्श्वभूमीवर मुंबईसह पुणे, नाशिक आणि नागपूर येथील प्रमुख बाजार समित्यांच्या कामकाजावर अधिक लक्ष केंद्रीत होण्याची शक्यता आहे. परिणामी पणन विभागाच्या कामकाजात वेग, पारदर्शकता आणि समन्वय वाढेल, अशी अपेक्षा व्यक्त केली जात आहे.