घरतांना डच्चू, निकमांकडे धुरा; ठाकरे शिवसेनेचे पनवेलचे नवे शिलेदार

आगामी स्थानिक स्वराज्य संस्थांच्या निवडणुका आणि पक्षांतर्गत समन्वय साधण्यासाठी 'मातोश्री'ने हे पाऊल उचलले असून, यामुळे पनवेलच्या राजकीय वर्तुळात मोठी खळबळ माजली आहे.

Deepak Nikam Panvel Shiv Sena UBT District President | Shirish Gharat removed from post | Panvel Political News Updates | Uddhav Thackeray Shiv Sena Panvel Unit

शिवसेना (उद्धव बाळासाहेब ठाकरे) पक्षाच्या पनवेल जिल्हाप्रमुखपदी दीपक निकम यांची नियुक्ती करण्यात आली असून, शिरीष घरत यांच्या जागी आता निकम संघटनेची धुरा सांभाळतील. (छायाचित्र:लोकसत्ता टीम)

पनवेल – पनवेल विधानसभा मतदारसंघातील शिवसेना (उद्धव बाळासाहेब ठाकरे) पक्षाच्या संघटनात्मक बांधणीत मोठा बदल करण्यात आला असून, विद्यमान जिल्हाप्रमुख शिरीष घरत यांना पदावरून बाजूला करत दीपक निकम यांची जिल्हाप्रमुखपदी नियुक्ती करण्यात आली आहे. आगामी स्थानिक स्वराज्य संस्थांच्या निवडणुका आणि संघटन विस्ताराच्या पार्श्वभूमीवर शिवसेनेच्या मातोश्रीकडून हा महत्त्वाचा निर्णय घेण्यात आला आहे.

पनवेल महापालिका निवडणुकीनंतर विविध पक्षांमध्ये संघटनात्मक फेरबदलांना वेग आला आहे. त्याची सुरुवात ठाकरे गटाच्या शिवसेनेकडून झाली आहे. जिल्हाप्रमुखपदाबरोबरच पनवेल शहर उपजिल्हाप्रमुखपदी रामदास पाटील, पनवेल ग्रामीण उपजिल्हाप्रमुखपदी भरत पाटील, तर पनवेल महापालिका क्षेत्राच्या महानगरप्रमुखपदी समाधान काशिद यांची नियुक्ती करण्यात आली.

महापालिका निवडणुकीत ठाकरे गटाने शेकाप, काँग्रेस आणि राष्ट्रवादी काँग्रेस (शरद पवार गट) यांच्यासोबत महाविकास आघाडीतून निवडणूक लढवली होती. या निवडणुकीत पक्षाचे पाच नगरसेवक निवडून आल्यानंतर मात्र ठाकरे गटाने महाविकास आघाडीपासून स्वतंत्र भूमिका घेतली. या यशामध्ये नगरसेविका लीना गरड, शिरीष घरत आणि बबन पाटील यांच्यासह शिवसैनिकांची समन्वयाची महत्त्वाची भूमिका होती.

हेही वाचा

परिवहनच्या बस प्रवास सवलतीच्या नोंदणीला मुदत वाढ

दीपक निकम हे जुने आणि निष्ठावंत शिवसैनिक म्हणून ओळखले जातात. त्यांच्या नियुक्तीमुळे पनवेलमधील शिवसैनिकांतील मतभेद दूर करून संघटनेत समन्वय साधण्याची जबाबदारी त्यांच्यावर सोपविण्यात आली आहे. आगरी समाजातील शिवसैनिक आणि कॉलनी भागातील कार्यकर्त्यांतील दुरावा कमी करणे, नाराज शिवसैनिकांना पुन्हा सक्रिय करणे आणि मित्रपक्षांशी संबंध सुधारण्याचे मोठे आव्हान त्यांच्यासमोर आहे.

जिल्हा सल्लागार बबन पाटील यांच्या मार्गदर्शनाखाली निकम यांना संघटन मजबूत करण्यासाठी कसोटीचा काळ पार करावा लागणार असून, त्यांच्या नियुक्तीमुळे जुन्या शिवसैनिकांमध्ये नव्या उत्साहाचे वातावरण निर्माण झाले आहे. मात्र निकम यांना पक्षाची आर्थिक बाजूही संभाळावी लागणार आहे. निकम यांच्या नियुक्तीने घरत यांच्या गटातील शिवसैनिक व पदाधिकारी नाराज आहेत.

त्या गटाला वेळीच शांत न केल्यास ठाकरे गटात मोठी फूट पडण्याची शक्यता निर्माण झाली आहे. महापालिकेच्या विद्यमान गटनेत्या लीना गरड यांना विधानसभा निवडणूकीची उमेदवारी देऊन नारीशक्तीचा संदेश प्रबोधनकारांच्या पनवेलमधून उद्धव ठाकरे यांनी यापूर्वीच दिला.