उरण : जेएनपीए बंदराची खोली वाढल्याने गेटवे टर्मिनल या खासगी बंदरात आज पर्यंतचे सर्वात मोठे मालवाहू जहाज दाखल झाले आहे. ‘एमएससी रेग्युलस’ नावाचे जहाज असून त्याचे कंटेनर क्षमता सुमारे तेरा हजारांवर आहे. आतापर्यंत १२ हजार कंटेनरची क्षमता असलेली जहाजे येत होती. या जहाजाची लांबी ३३६.३७ मीटर आहे. बंदरात यापूर्वी १५.०३ मीटर खोलीपर्यंत मालवाहू जहाज लागली आहेत. मात्र १५.८० मीटर खोलीची क्षमता असलेले महाकाय मालवाहू जहाज पहिल्यांदाच दाखल झाले आहे. पायलट कॅप्टन मनीष कुमार यांनी हे जहाज बंदरात उतरवले. हे मालवाहू जहाज सौदी अरेबियातून जेएनपीए बंदरात आले असून गुजरातमधील मुन्द्रा पोर्टकडे रवाना होणार आहे.