वसईच्या गिरीज परिसरात एक इसम भटक्या श्वानाला छऱ्याच्या बंदुकीने गोळी मारत असताना, त्याचे लक्ष चुकल्याने रस्त्यावरून जात असणाऱ्या महिलेच्या पायाला गोळी लागून महिला जखमी झाली आहे. वसई पोलिसांनी या इसमावर गुन्हा दाखल केला असून महिलेला उपचारासाठी रुग्णालयात दाखल केले आहे. हेही वाचा- शासकीय आश्रमशाळेतील विद्यार्थिनीचा मृत्यू ; शिक्षकांची हलगर्जी; कुटुंबीयांचा आरोप वसई पश्चिमेकडील गिरीज परिसरातील निंबट वाडी या परिसरात राहणारा मायकल कुटीनो परिसरातील भटक्या श्वानांचा उपद्रव वाढल्याने हैराण झाला होता. यामुळे त्याने आपल्या घरातील छऱ्याच्या बंदूकीने या श्वानांना मारण्याचा बेत आखला. शुक्रवारी तो या श्वानांना लक्ष करत असताना अचानक त्याचे लक्ष चुकले आणि यावेळी रस्त्यावरून जात असणाऱ्या सारिका भाईर यांच्या पायाला गोळी लागली. यात गोळी मांडीत घुसल्याने त्या जखमी झाल्या. आणि त्यांना उपचारासाठी बंगली येथिल रुग्णालयात दाखल करण्यात आले. तर मायकलवर पोलिसांनी गुन्हा दाखल केल्याचे वसई पोलीस ठाण्याचे वरीष्ठ पोलीस नरिक्षक कल्याणराव करपे यांनी सांगितले.
