पालघर/वाडा: वाडा तालुक्यातील महावितरण विभागाचे उप कार्यकारी अभियंता ज्ञानेश्वर वट्टमवार यांना एक लाख रुपयांची लाच स्वीकारताना लाचलुचपत प्रतिबंधक विभागाने रंगेहात पकडले आहे. विभागाच्या पालघर पथकाने ही कारवाई केली. वट्टमवार हे अनेक कारणांमुळे गाजलेले अधिकारी आहेत असे सांगितले जाते. त्यांनी तक्रारदार यांच्याकडून बिल मंजूर करून घेण्यासाठी एक लाख रुपायांची लाच मागितल्याने तक्रारदार यांनी तशी तक्रार पालघरच्या लाच लुचपत प्रतिबंधक विभागाकडे केली. तक्रारदाराने केलेल्या तक्रारीनुसार या प्रकरणाची शहानिशा केल्यानंतर तथ्य आढळून आले. त्यानंतर लाचलुचपत पालघरचे पोलीस उप अधीक्षक नवनाथ जगताप,पोलीस निरीक्षक स्वप्नन बिश्वास यांच्या पथकाने सापळा रचला. तक्रारदाराने एक लाखांची लाच स्वीकारताना वट्टमवार यांना रंगेहात पकडल्यानंतर पालघर पथकाने त्यांना ताब्यात घेतले व वाडा पोलीस ठाण्यात गुन्हा दाखल करण्याची प्रक्रिया सुरू केली आहे.