केळवे रोड येथे तांत्रिक बिघाडामुळे हेलिकॉप्टरची आपत्कालीन लँडिंग

दुपारी साडेबारा वाजताच्या सुमारास एक हेलिकॉप्टर केळवे रोड परिसरात घीरट्या मारत होते. या हेलिकॉप्टर मधील वैमानिकांनी केळवे रोड येथील विद्यावैभव हायस्कूलच्या मैदानात सुरक्षित लँडिंग केले. या हेलिकॉप्टरमध्ये वैमानिक, सह वैमानिक, एक तांत्रिक कर्मचारी (अभियंता) व इतर एक व्यक्ती अशी एकूण चार प्रवासी होते.

उड्डाणादरम्यान हेलिकॉप्टरमध्ये ‘रेड लाईट’ सूचित झाल्याने संभाव्य धोका ओळखून वैमानिकांनी तात्काळ जवळील मोकळे मैदान शोधले. प्रसंगावधान राखत परिस्थिती गंभीर होण्यापूर्वीच हेलिकॉप्टर शाळेच्या मैदानात सुरक्षित उतरवण्यात आले.

आपत्कालीन लँडिंगनंतर तांत्रिक पथकाशी संपर्क साधून त्यांच्या मार्गदर्शनाखाली आवश्यक दुरुस्ती करण्यात आली. दुरुस्ती प्रक्रियेस सुमारे ४५ मिनिटांनी सव्वा वाजल्याच्या सुमारास या हेलिकॉप्टरने नियोजित सुरत कडील प्रवास रद्द करून सुरक्षिततेच्या दृष्टीने हेलिकॉप्टर नंतर जुहू येथील मुख्य कार्यालयाच्या दिशेने रवाना झाले.

हेलिकॉप्टरचा आवाज आल्यानंतर केळवे रोड पोलीस चौकी वरील कर्मचारी तातडीने शाळेजवळ पोहोचले. बघणार यांची गर्दी झाल्याने पोलिसांनी आवश्यक उपाय योजना आखल्या व सफाळे येथून अतिरिक्त बंदोबस मागून घेण्यात आला होता.

या संदर्भात सफाळा पोलीस ठाण्याचे सहाय्यक पोलीस निरीक्षक दत्ता शेळके यांनी सांगितले की तांत्रिक बिघाड झाल्याने हेलिकॉप्टर आपत्कालीनरीत्या खाली उतरवण्यात आले. या हेलिकॉप्टर मधील चारही व्यक्ती हेलिकॉप्टर च्या जवळ उभी होती व इतरत्र कुठेही गेली नसल्याची माहिती पुढे आली आहे. दुरुस्ती करून ते सुरक्षितपणे जुहूकडे रवाना झाले असून कोणतीही जीवितहानी झालेली नाही असे सांगितले. या घटनेबद्दल पालघर जिल्हाधिकारी कार्यालयाकडे कोणतीही माहिती संबंधित विमान कंपनीने दिली नसल्याचे सांगण्यात आले.