जंतुनाशके खरेदी आणि फवारणीच्या कामासाठी बेकायदा, नियमबाह्य व सदोष निविदा प्रक्रिया राबविणे, ज्यादा दराने निविदा मंजूर करणे, मुदतबाह्य व निकृष्ट जंतुनाशके, कीटकनाशके खरेदी करणे आदी कारणांमुळे २००८-०९ ते २०२२-२३ या कालावधीत पालघर नगर परिषदेच्या निधीतून नऊ कोटी ६० लाख रुपयांचा आर्थिक गैरव्यवहार झाल्याचा आरोप होत आहे.
नगर परिषदेच्या ठेकेदारांकडे नगरपालिका, महापालिका क्षेत्रात जंतुनाशके व कीटकनाशकांचा पुरवठा अथवा फवारणीचा अनुभव नाही. ठकेदाराकडे उद्योग संचालनाची मान्यताप्राप्त ठेकेदार म्हणून नोंदणी नसतानाही ते सध्या कार्यरत आहेत. पालघरचे स्वीकृत नगरसेवक अरुण माने यांना ४ मे रोजी आरोग्य विभागाच्या पाहणीत विद्यमान ठेकेदाराने मुदतबाह्य, निकृष्ट, स्वत: पॅकिंग व सील केलेले, अर्धवट भरलेले जंतुनाशक व कीटकनाशक यांचा साठा नगर परिषदेला पुरविल्याची माहिती मिळाली. तसेच कीटकनाशकाचे कागदी आवरण व बाटलीवरील उत्पादनाबाबतच्या तपशिलात विसंगती आढळली. त्यावरून कालबाह्य व बनावट कीटकनाशकाचा वापर नगर परिषद हद्दीत होत असल्याचे त्यांच्या निदर्शनास आले.
Palghar News (पालघर न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Financial scam allegation on palghar municipal council over purchase of pesticides zws