मुंबई अहमदाबाद महामार्गावर भीषण अपघात; वाहनाच्या धडकेत आईचा मृत्यू तर मुलगा गंभीर जखमी

मुंबई अहमदाबाद राष्ट्रीय महामार्गावर बुधवारी सकाळच्या सुमारास भीषण अपघात घडला. महामार्गावरील हालोली गावच्या हद्दीतील पाडोस पाडा येथे सकाळी सव्वा आठ वाजेच्या सुमारास भरधाव वेगातील इनोवा कारने गुजरात मार्गीका पायी ओलांडण्याचा प्रयत्न करणाऱ्या माय लेकाला जोरदार धडक दिली. कारच्या धडकेत प्रतीक्षा प्रभाकर पाडोसा (४०) या महिलेचा जागीच मृत्यू झाला तर तिचा मुलगा तुषार प्रभाकर पाडोसा (१७) हा गंभीर जखमी झाला असून त्याला उपचारासाठी खाजगी रुग्णालयात दाखल करण्यात आले आहे. अपघातानंतर इनोवा कार नियंत्रण सुटून उलटल्याने कारचालक आणि इतर दोन प्रवासी किरकोळ जखमी झाले. अपघाताची माहिती मिळताच मनोर आणि महामार्ग पोलीस तातडीने घटनास्थळी दाखल होऊन अपघातामध्ये मृत झालेल्या महिलेचा मृतदेह ताब्यात घेऊन शवविच्छेदनासाठी ग्रामीण रुग्णालयात पाठवण्यात आला.

अपघातानंतर स्थानिक नागरिकांचा संताप :

मुंबई अहमदाबाद राष्ट्रीय महामार्गावरील हालोली पाडोस पाडा येथे तीव्र स्वरूपाचे वळण असून यामुळे पायी रस्ता ओलांडणाऱ्या स्थानिक नागरिकांना दोन्ही बाजूने वेगात येणाऱ्या वाहनांचा अंदाज येत नाही. पाडोस पाडा हा महामार्गाच्या पश्चिम बाजूला असून पूर्व बाजूला नागरिकांच्या शेतजमिनी आहेत. या ठिकाणी महामार्ग ओलांडण्यासाठी पादचारी पूल नसल्यामुळे स्थानिक नागरिकांना जीव मुठीत घेऊन नाईलाजाने महामार्ग ओलांडावा लागतो. आतापर्यंत या पाड्यातील काही नागरिकांचा महामार्ग ओलांडा मृत्यू झाला आहे. राष्ट्रीय महामार्ग प्राधिकरण कडून पाडोस पाडा येथे पादचारी पूल उभारण्याची मागणी पूर्ण करण्यात नाल्याने अपघातानंतर नागरिकांनी संताप व्यक्त केला.