डहाणू: चिंचणी समुद्रकिनाऱ्यावर सुट्टीचा आनंद घेण्यासाठी आलेल्या मोटारचालकाच्या स्टंटबाजीमुळे त्याच्या भरधाव मोटारीने दिलेल्या धडकेत १२ पर्यटक जखमी झाले, तर एका महिलेचा मृत्यू झाला. ही घटना बुधवारी सायंकाळच्या सुमारास घडली. चालक सचिन झोपे (५८) रा. बोईसर यांना पोलिसांनी ताब्यात घेतले आहे. या धडकेत हेतन खातून (६८) या गंभीर जखमी झाल्या. उपचारासाठी बोईसर येथे दाखल केले असता डॉक्टरांनी मृत घोषित केले. जखमींना दवाखान्यात नेण्यासाठी रुग्णवाहिकेसाठी चालक उपलब्ध नसल्याने सुज्ञ नागरिकांनी रुग्णवाहिका चालवून जखमींना बोईसर येथील रुग्णालयात पोहोचविले. प्रियंका कोम (१८) हिच्या डोक्याला इजा झाल्याने तिला बोईसरच्या खासगी रुग्णालयात दाखल करण्यात आले. इतर जखमींमध्ये महरुन्सा सामंसुरी (१२), वैष्णवी काटकर (११), आरोही दांडेकर (७०), एंजल दांडेकर (११), प्रियंका कोम (१८), ममता हाडळ ( १२), खैतून मंसुरी (७५), प्रीती हाडळ (११), मेहरान (१२), मेहेक (१५), शौर्या (६) यांचा समावेश आहे. त्यांच्यावर चिंचणी आरोग्य केंद्रात उपचार सुरू आहेत. चालकाविरुद्ध वाणगाव पोलीस ठाण्यात गुन्हा दाखल करण्यात आला असून तपास साहाय्यक पोलीस निरीक्षक श्रीकांत कोळी करत आहेत.
