Photos: सुबोध भावेच्या ५० व्या वाढदिवसाला ‘या’ दिग्गज नेत्यांची हजेरी; वाढदिवशी घेतला समाजसेवेचा संकल्प

मराठी चित्रपटसृष्टीतील लोकप्रिय अभिनेता सुबोध भावेने आपला ५० वा वाढदिवस आणि कलेच्या क्षेत्रातील २५ वर्षांचा प्रवास एकत्र साजरा करत संस्मरणीय क्षण अनुभवले. या खास सोहळ्याला त्याचे कुटुंबीय, निर्माते, दिग्दर्शक, लेखक, सहकलाकार तसेच पडद्यामागील कलाकार उपस्थित होते. उद्धव ठाकरे, राज ठाकरे, महाराष्ट्र भूषण अशोक सराफ, जेष्ठ दिग्दर्शक गोविंद निहलानी, सांस्कृतिक मंत्री आशीष शेलार यांसारख्या मान्यवरांनी या कार्यक्रमाला हजेरी लावली. सुबोध भावेने चाहत्यांचे आणि शुभेच्छुकांचे विशेष आभार मानले. सर्व शुभेच्छा मनापासून पोहोचल्या असल्या तरी वैयक्तिक प्रतिसाद देणे शक्य नसल्याचे त्यांनी नम्रपणे सांगितले. वाढदिवसाच्या निमित्ताने सुबोध भावेने सामाजिक बांधिलकीची नवी दिशा दाखवली. पुढील २५ महिन्यांसाठी तो दर महिन्याला एका सामाजिक संस्थेला आर्थिक मदत देणार आहे. या मदतीचा पहिला टप्पा सांस्कृतिक मंत्री आशीष शेलार यांच्या उपस्थितीत पूर्ण झाला. संस्थेचे प्रतिनिधी नागरगोजे सर यांना धनादेश सुपूर्द करण्यात आला. सुबोध भावेने सांगितले की, ‘शांतीवन’ संस्थेला दिलेली देणगी आयकर कायदा 80G अंतर्गत करमुक्त आहे आणि त्यासाठी पावती देण्यात येणार आहे. या उपक्रमाची सुरुवात बीड जिल्ह्यातील ‘शांतीवन’ या अनाथ मुलांसाठी कार्य करणाऱ्या संस्थेला पहिला धनादेश देऊन करण्यात आली. “समाजाने दिलेलं प्रेम परत देण्याची ही माझी छोटीशी सुरुवात आहे,” असे म्हणत सुबोधने आपल्या चाहत्यांनादेखील सामाजिक कार्यात सहभागी होण्याचे आवाहन केले. (सर्व फोटो सौजन्य : सुबोध भावे/इन्स्टाग्राम)