मराठी अभिनेत्रीने उरकला साखपुडा, फोटो शेअर करत दिली आनंदाची बातमी!

कलर्स मराठी चॅनलवरच्या ‘ढोलकीच्या तालावर’ या लावणीवर आधारित रिअॅलिटी शोमधून रिचा अग्निहोत्रीला लोकप्रियता मिळाली. आपल्या नृत्य कौशल्याची छाप उमटवून अवघ्या महाराष्ट्रात पोहचलेली रिचा अग्निहोत्री हिने साखरपुडा केला आहे. रिचा अग्निहोत्रीने अथर्व गोडसेशी साखरपुडा केला आहे. तिने साखरपुड्याचे फोटो शेअर केले आहेत. रिचा व अथर्वला चाहते नवीन प्रवासासाठी शुभेच्छा देत आहेत. रिचा अग्निहोत्री मुळची ठाण्याची आहे. आई वैष्णवी अग्निहोत्री यांच्याकडून कथ्थक आणि गाण्याचे प्राथमिक धडे तिने गिरवले. रिचा अग्निहोत्रीने ‘मिस ठाणे' हा किताबही पटकावला होता. तसंच ‘अमूल’च्या जाहिरातीतही ती चमकली होती. महानायक अमिताभ बच्चन यांच्यासमोरही तिनं नृत्य सादर केलं होतं. कलर्स मराठीवरील ‘ढोलकीच्या तालावर’च्या आधीच्या पर्वातही तिचा सहभाग होता. घाडगे अँड सूनमध्येही तिने काम केलं होतं. तिचं नृत्य कौशल्य पाहून ढोलकीच्या तालावरच्या नुकत्याच झालेल्या पर्वात स्पर्धक म्हणून सहभागी होण्याची संधी तिला मिळाली आणि त्याचं सोनं करत तिनं टॉप फाइव्हपर्यंत मजल मारली होती. (फोटो- रिचा अग्निहोत्री इन्स्टाग्राम)