Bigg Boss Marathi 6 मधील करण सोनावणेवर होतं आर्थिक संकट; म्हणालेला, "लोक पैसे मागायला यायचे तेव्हा वडील..."

‘बिग बॉस मराठी ६’च्या घरात यंदा सोशल मीडियावर 'फोकस्ड इंडियन' म्हणून लोकप्रिय असलेल्या इन्फ्ल्यूएन्सर करण सोनावणेची एन्ट्री झाली आहे. सोशल मीडियावर विनोदी रीलद्वारे प्रेक्षकांना हसवणाऱ्या करणनं प्रत्यक्ष आयुष्यात मात्र संघर्ष केला आहे. याबद्दल त्यानं काही दिवसांपूर्वी 'बिग बॉस'च्या घरात खुलासा केला. 'बिग बॉस'च्या घरात करण म्हणालेला, "घरी लोक पैसे मागायला यायचे, तेव्हा पप्पा लपायचे; पण मला तेव्हा ते कळायचं नाही. याचा मला ट्रॉमा आहे." यापुढे तो म्हणालेला, "मला माझ्या मुलाला आयुष्यात जे हवंय, ते सगळं मिळायला पाहिजे. असं म्हणतात की, पैशानं आनंद विकत घेता येत नाही; पण मला असं वाटत नाही. तुम्ही पैशांनी आनंद विकत घेऊ शकता." तसंच त्यानं म्हटलेलं, "मी आई-वडिलांना दुबईला घेऊन गेलो होतो. तिथे 'बुर्ज खलिफा'च्या येथे घेऊन गेलो. तिथे त्यांच्यासाठी एक खोली घेतली. तिथे मी त्यांना एक सरप्राईजही दिलं ते म्हणजे स्काय डायव्हिंगचं..." स्काय डायव्हिंगचा अनुभव शेअर करीत करण म्हणालेला, "स्काय डायव्हिंगपेक्षा अजून मोठा अनुभव काय असू शकतो. ४० वर्षं बँकेत काम केलेला माणूस आणि आई यांच्यासाठी तो अनुभव खूपच छान होता." पुढे तो म्हणाला, "तुम्ही पैशांनी आनंद विकत घेऊ शकता. माझ्या आई-बाबांचंसुद्धा तेच म्हणणं आहे. पैशानं आनंद विकत घेता येतो, तुम्हाला तो विकत घेता आला पाहिजे." करण हा लोकप्रिय सोशल मीडिया इन्फ्ल्यूएन्सर आहे. करणच्या अनेक रील चाहत्यांच्या पसंतीस उतरल्या आहेत. त्याचे अनेक व्हिडीओला मिलियनमध्ये व्ह्यूज आहेत. करणनं भारताचे क्रिकेट सामने आणि IPL मधील मुंबई इंडियन्स संघातील क्रिकेटपटूंसह रील केल्या आहेत. तसेच त्यानं अनेक बॉलीवूड अभिनेत्यांबरोबरही काही मजेशीर व्हिडीओ केले आहेत. (सर्व फोटो सौजन्य : इन्स्टाग्राम)