Photos: राणी मुखर्जीच्या 'मर्दानी ३' चित्रपटात झळकली मराठमोळी अवनी जोशी; कोण आहे ही बालकलाकार?

बॉलिवूड अभिनेत्री राणी मुखर्जीचा (Rani Mukerji) बहुप्रतिक्षित 'मर्दानी ३' (Mardaani 3 Movie) हा चित्रपट सध्या चर्चेत आहे. मुलींचे बेपत्ता होणे आणि मानवी तस्करी यांसारख्या गंभीर विषयावर भाष्य करणाऱ्या या चित्रपटात एका मराठमोळ्या बालकलाकाराने सर्वांचे लक्ष वेधून घेतले आहे. ती म्हणजे गोड गळ्याची आणि तितक्याच प्रभावी अभिनयाची देणगी लाभलेली बालकलाकार अवनी जोशी (Avanee Joshi). यशराज फिल्म्सची निर्मिती आणि अभिराज मिनावाला यांच्या दिग्दर्शनाखाली बनलेल्या या चित्रपटात राणी मुखर्जीबरोबर मल्लिका प्रसाद आणि जानकी बोडीवाला यांच्या महत्त्वाच्या भूमिका आहेत. या दिग्गज कलाकारांच्या मांदियाळीत अवनी जोशी एका महत्त्वपूर्ण आणि मध्यवर्ती भूमिकेत दिसणार आहे. कडक ऑडिशनचे अनेक टप्पे यशस्वीरीत्या पार पाडल्यानंतर अवनीची या भूमिकेसाठी निवड झाली. अवनीला अभिनयाबरोबरच संगीताचाही वारसा लाभला आहे. अवनी सुप्रसिद्ध गायक अनिरुद्ध जोशी आणि गायिका रसिका जोशी यांची कन्या आहे. 'मर्दानी ३' पूर्वी अवनीने अनेक मराठी मालिका आणि रिॲलिटी शो गाजवले आहेत. नुकत्याच प्रदर्शित झालेल्या 'जारण' या चित्रपटातील तिच्या अभिनयाचे विशेष कौतुक झाले होते. "यशराज फिल्म्ससारख्या मोठ्या बॅनरबरोबर आणि राणी मुखर्जींसारख्या दिग्गज अभिनेत्रीबरोबर काम करण्याचा अनुभव खूप काही शिकवून जाणारा होता," अशा भावना अवनीने या निमित्ताने व्यक्त केल्या. ट्रेलरला मिळालेला तुफान प्रतिसाद पाहता, अवनीची ही बॉलिवूड झेप तिच्या करिअरला नवी दिशा देणारी ठरेल, अशी चिन्हे दिसत आहेत. (सर्व फोटो सौजन्य : अवनी जोशी/इन्स्टाग्राम) (हेही पाहा : मुलाच्या साखरपुड्यात मंजिरी ओकच्या साडीची चर्चा, काय आहे खास? पाहा...)