Photos: ‘ये है मोहब्बतें’मधील माय-लेकीची जोडी पुन्हा चर्चेत; लाडक्या इशिमाच्या डोहाळे जेवणासाठी रुहीची खास हजेरी!

छोट्या पडद्यावरील लोकप्रिय अभिनेत्री दिव्यांका त्रिपाठी सध्या आपल्या आयुष्यातील एका अतिशय सुखद टप्प्याचा आनंद घेत आहे. वैवाहिक जीवनाला १० वर्षे पूर्ण झाल्यानंतर वयाच्या ४१ व्या वर्षी दिव्यांकाच्या घरी लवकरच पाळणा हलणार आहे. दिव्यांकाचा डोहाळे जेवणाचा कार्यक्रम नुकताच अत्यंत शाही थाटात पार पडला. आपल्या लाडक्या 'इशिमा'च्या या खास सोहळ्यासाठी अभिनेत्री रुहानिका धवनने विशेष हजेरी लावली होती. या सोहळ्यातील काही टिपलेले सुंदर क्षण रुहानिकाने सोशल मीडियाच्या माध्यमातून चाहत्यांसोबत शेअर केले आहेत. जुन्या आणि नवीन फोटोंचा एक कोलाज पोस्ट करून रुहानिकाने 'ये है मोहब्बतें'च्या आठवणींना पुन्हा एकदा उजाळा दिला आहे. "आई हे आयुष्यातील सर्वात सुंदर पान असतं आणि सुदैवाने माझ्या आयुष्यात अशा दोन व्यक्ती आहेत; आजचा दिवस माझ्यासाठी खूप खास आहे—माझ्या ऑन-स्क्रीन 'इशिमा'ला खऱ्या आयुष्यात आई होताना पाहणं ही एक पर्वणीच आहे. @divyankatripathidahiya, आपण भेटल्यापासून तू माझ्यासाठी आईसारखीच राहिली आहेस. या नवीन प्रवासासाठी तुझ्यापेक्षा जास्त भारी आणि प्रेरणादायी व्यक्ती दुसरी कोणीच असू शकत नाही," असे भावनिक कॅप्शन तिने दिले आहे. चाळिशीनंतर आई होण्याचा निर्णय घेतल्यामुळे चाहत्यांकडून आणि मनोरंजन सृष्टीतून दिव्यांकावर कौतुकाचा वर्षाव होत आहे. (सर्व फोटो सौजन्य: रुहानिका धवन/इन्स्टाग्राम)