‘लागिरं झालं जी’ फेम मामीच्या २३ वर्षांच्या जुळ्या मुलींना पाहिलंत का? आईसह 'या' मालिकेत करत आहेत काम

इंडस्ट्रीमध्ये असे अनेक कलाकार आहेत, ज्यांचे भाऊ-बहीण, आई-वडील, पती-मुलगा-मुलगी-बायको किंवा इतर नातेवाईकही मनोरंजनसृष्टीत काम करतात. त्यामध्ये मीरा व मधुरा वेलणकर या बहिणी, त्यांचे वडील प्रदीप वेलणकर तसेच मधुरा वेलणकरचे सासरे हे शिवाजी साटम आहेत. असे अनेक कलाकार आहेत, ज्यांचे जवळचे नातेवाईक याच इंडस्ट्रीमध्ये काम करतात. पण, अगदी मोजक्याच वेळा त्यांना एकाच मालिकेत, चित्रपटात, नाटकात किंवा वेब सीरिजमध्ये एकत्र काम करण्याची संधी मिळते. एक अभिनेत्री व तिच्या दोन जुळ्या मुली एकाच मालिकेत काम करत आहेत, हे तुम्हाला माहीत आहे का? लागिरं झालं जी या मालिकेत मामी या भूमिकेतून अभिनेत्री विद्या सावळेला मोठ्या प्रमाणात लोकप्रियता मिळाली. त्यानंतर जीव झाला वेडापिसा, तसेच राजा राणीची गं जोडी, सिंधूताई माझी आई अशा लोकप्रिय ठरलेल्या मालिकांमध्ये अभिनेत्रीने विविध भूमिका साकारल्या. अभिनेत्रीच्या सर्व भूमिकांना मोठ्या प्रमाणात लोकप्रियता मिळाली. सध्या अभिनेत्री इन्स्पेक्टर मंजू या मालिकेत काम करीत आहे. विशेष म्हणजे अभिनेत्रीबरोबर तिच्या दोन्ही जुळ्या मुली याच मालिकेत महत्त्वाच्या भूमिकेत दिसत आहेत. निकिता आणि नेहा शिंदे अशी त्यांची नावे आहेत. त्या २३ वर्षांच्या आहेत. (सर्व फोटो सौजन्य: विद्या सावळे इन्स्टाग्राम)