अनंत अंबानींना मिळणार १० ते २० कोटी रुपये वार्षिक पगार; रिलायन्सच्या 'या' पदावर आहेत कार्यरत

रिलायन्स इंडस्ट्रीज लिमिटेडचे अध्यक्ष मुकेश अंबानी यांचे धाकटे पुत्र अनंत अंबानी यांची मे २०२५ मध्ये कंपनीचे कार्यकारी संचालक म्हणून नियुक्ती करण्यात आली आहे. आता कंपनीने एक्सचेंज फाइलिंगद्वारे अनंत यांना दरवर्षी किती पगार मिळेल हे सांगितले आहे. कंपनीने म्हटले आहे की, कंपनीची HRNR समिती दरवर्षी त्यांचा पगार किती वाढवायचा हे ठरवेल. एक्सचेंज फाइलिंगनुसार, अनंत अंबानी यांना रिलायन्स इंडस्ट्रीज लिमिटेडकडून वार्षिक १० ते २० कोटी रुपये पगार आणि कंपनीच्या नफ्यावरील कमिशनसह अनेक भत्ते दिले जातील. पगाराव्यतिरिक्त, अनंत अंबानी यांना राहण्यासाठी घर किंवा घरभाडे भत्ता, घर देखभाल खर्च, वीज, पाणी, गॅस, फर्निचर आणि दुरुस्ती खर्च, कुटुंबासह प्रवासाचा खर्च यासारख्या गोष्टींसाठी पैसे दिले जातील. एक्सचेंज फाइलिंगमध्ये असेही म्हटले आहे की, कंपनी रिलायन्सच्या सर्व कार्यकारी संचालकांना दरवर्षी त्यांच्या निव्वळ नफ्याच्या फक्त १% पगार आणि भत्ते म्हणून देऊ शकते. अनंत अंबानी यांचे शालेय शिक्षण मुंबईतच झाले. त्यांनी मुंबईतील धीरूभाई अंबानी इंटरनॅशन स्कूलमधून शिक्षण पूर्ण केले आहे. शालेय शिक्षणानंतर अनंत अंबानी यांनी अमेरिकेतील ब्राउन विद्यापीठातून अर्थशास्त्रात पदवी प्राप्त केली. रिलायन्सच्या उत्तराधिकार योजनेचा भाग म्हणून, अंबानींच्या तीन मुलांना (आकाश, ईशा आणि अनंत) वेगवेगळ्या व्यवसाय युनिट्सची जबाबदारी देण्यात आली आहे. आकाश अंबानींबद्दल बोलायचे झाले तर, ते जिओ इन्फोकॉमचे अध्यक्ष आहेत. ईशा अंबानी रिलायन्स रिटेल आणि ई-कॉमर्सची जबाबदारी सांभाळतात. तर, अनंत अंबानी ऊर्जा आणि रसायन व्यवसायात महत्त्वाची भूमिका बजावत आहेत. (सर्व फोटो सौजन्य: पीटीआय)