Ajit Pawar Last Rites: 'अमर रहे!' अजित पवारांना काटेवाडीतील निवासस्थानी मानवंदना

Ajit Pawar Funeral Updates: काटेवाडी, बारामती येथे अत्यंत शोकाकुल वातावरणात महाराष्ट्राचे उपमुख्यमंत्री अजित पवार यांना शासकीय मानवंदना देण्यात आली. काल (२८ जानेवारी) बारामती येथे झालेल्या एका चार्टर विमान अपघातात अजित पवार यांचे दुर्दैवी निधन झाले. यावेळी त्यांचे कुटुंबीय पत्नी सुनेत्रा पवार, आणि मुले पार्थ व जय पवार उपस्थित होते. पवार कुटुंबासह राजकीय क्षेत्रातील अनेक दिग्गज आणि हजारो कार्यकर्ते उपस्थित होते. अजित पवारांना शासकीय मानवंदना देण्यात आली असून काटेवाडीतून त्यांचं पार्थिव आता विद्याप्रतिष्ठान येथे आणण्यात येत आहे. 'अमर रहे अमर रहे अजित दादा अमर रहे'च्या घोषणा कार्यकर्त्यांकडून दिल्या जात आहेत. अजित पवारांच्या अंत्ययात्रेसाठी शरद पवार विद्याप्रतिष्ठान येथे पोहोचले. माजी केंद्रीय मंत्री सुशील कुमार शिंदे आणि खासदार प्रणिती शिंदे अजित पवारांचं अंतिम दर्शन घेण्याकरता विद्याप्रतिष्ठान येथे दाखल झाले आहेत. राज्याचे माजी मुख्यमंत्री उद्धव ठाकरे आणि त्यांच्या कुटुंबीयांनी पवार कुटुंबाची भेट घेतली. रश्मी ठाकरे यांनी सुनेत्रा पवारांचं सांत्वन केले. सकाळी ११ वाजता पंतप्रधान नरेंद्र मोदी, केंद्रीय गृहमंत्री अमित शाह यांच्या उपस्थितीत त्यांच्यावर अंत्यसंस्कार करण्यात येणार आहे.