Union Budget 2026: सामान्यांना मोठा दिलासा; आता ‘या’ गंभीर आजारांवरील औषधं आता स्वस्त होणार!

केंद्रीय अर्थमंत्री निर्मला सीतारामन यांनी आज लोकसभेत अर्थसंकल्प २०२६ सादर करून देशाचा नवीन आर्थिक आराखडा मांडला. देशाच्या प्रगतीची 'रिफॉर्म एक्सप्रेस' सुसाट धावत असल्याचे नमूद करत त्यांनी आरोग्य आणि औषध निर्मिती क्षेत्रासाठी अत्यंत महत्त्वाच्या घोषणा केल्या आहेत. भारताला औषध निर्मितीमध्ये जागतिक केंद्र (Global Hub) बनवण्यासाठी सरकारने पुढील ५ वर्षांसाठी ‘बायो-फार्मा शक्ती’ ही महत्त्वाकांक्षी योजना प्रस्तावित केली आहे. या नव्या धोरणामुळे सर्वात मोठा फायदा सामान्य रुग्णांना होणार आहे. कॅन्सर (कर्करोग) आणि डायबेटिस (मधुमेह) सारख्या गंभीर आजारांवरील महागडी औषधे आता सर्वसामान्यांच्या आवाक्यात येतील. बायोफार्म आणि सेमीकंडक्टर क्षेत्राला गती देण्यासाठी सरकारने अर्थसंकल्पात अनेक महत्त्वपूर्ण तरतुदी केल्या आहेत. विशेषतः या क्षेत्रातील लघु आणि मध्यम उद्योगांसाठी (SMEs) १० हजार कोटींच्या 'SME ग्रोथ फंड'ची घोषणा करण्यात आली आहे. देशाला जागतिक बायो-फार्मा उत्पादन केंद्र बनवण्यासाठी सरकारने 'बायो फार्मा शक्ती' योजनेचा नवा प्रस्ताव ठेवला आहे. या योजनेमुळे देशात जैविक औषधांच्या (Biologics) उत्पादनासाठी एक सक्षम इकोसिस्टम तयार होईल. भारताला बायोफार्मास्युटिकल हबमध्ये रूपांतरित केल्यामुळे महागडी औषधे आता परवडणाऱ्या किमतीत उपलब्ध होतील.