Union Budget 2026-2027: नवीन आयकर कायद्यासह 'या' क्षेत्रांत मिळणार मोठी कर सवलत

आज केंद्रीय अर्थमंत्री निर्मला सीतारमन यांनी अर्थसंकल्प २०२६ सादर केला असून यात कर सवलतींबाबत काही महत्त्वाचे निर्णय जाहीर केले आहेत. यामध्ये सर्वसामान्यांच्या खिशाला दिलासा देणाऱ्या अनेक कर सवलतींची घोषणा करण्यात आली आहे. देशातील करदात्यांसाठी सर्वात मोठी घोषणा म्हणजे १ एप्रिल २०२६ पासून संपूर्ण भारतात नवीन आयकर कायदा लागू केला जाणार आहे. आरोग्य आणि शिक्षणासाठी आकारल्या जाणाऱ्या टीसीएस (TCS) दरात मोठी कपात करण्यात आली असून आता तो ५ टक्क्यांवरून थेट २ टक्क्यांवर आणली आहे. अपघाती विम्यातून मिळणाऱ्या रकमेवर आता कोणत्याही प्रकारचा टॅक्स लागणार नसल्याची महत्त्वाची घोषणा या अर्थसंकल्पात करण्यात आली आहे. तंत्रज्ञान क्षेत्राला बळ देण्यासाठी क्लाउड सर्व्हिसेस पुरवणाऱ्या परदेशी कंपन्यांना २०४७ पर्यंत करातून पूर्णपणे मुक्ती देण्याचा निर्णय घेण्यात आला आहे. शिक्षण आणि वैद्यकीय उपचारांसाठी परदेशात पैसा पाठवणे आता स्वस्त होणार असल्याने मध्यमवर्गीय कुटुंबांना या निर्णयाचा मोठा फायदा होईल. डिजिटल पायाभूत सुविधांचा विस्तार करण्यासाठी परदेशी तंत्रज्ञान कंपन्यांना दिलेली ही करमाफी भारताला जागतिक तंत्रज्ञानाचे केंद्र बनवण्यासाठी साहाय्यक ठरेल.