उत्तर प्रदेशातील आठ पोलिसांची हत्या करणाऱ्या कुख्यात गुंड विकास दुबेला पोलिसांनी चकमकीत ठार केलं आहे. विकास दुबे याने गेल्या कित्येक वर्षांपासून आपली दहशत कायम ठेवली होती. हा विकास दुबे नेमका कोण होता ? जाणून घेऊयात.

कानपूरजवळ असलेल्या शिवली पोलीस ठाणे हद्दीत येणारं बिकरू हे विकास दुबे याचं मूळ गाव.

उत्तर प्रदेशात बहुजन समाज पक्षाची सत्ता होती, त्यावेळी विकास दुबेचा बराच दबदबा होता. त्या काळात विकास दुबेनं गुन्हेगारी जगतात जम बसवत चांगलाच पैसा कमावला असल्याचं त्याचे गावकरी सांगतात.

विकास दुबेला दोन मुलं आहेत. त्यापैकी एक मुलगा लंडनमध्ये एमबीबीएसचं शिक्षण घेतोय. तर दुसरा कानपूरमध्ये शिकत आहे.

विकास दुबेवर चौबेपूर पोलीस ठाण्यात ६० गुन्हे दाखल होते. या गुन्ह्यांमध्ये खंडणी, अपहरण, हत्येचे गुन्हे दाखल होते.

चौबेपूर पोलीस ठाण्यात दाखल करण्यात झालेल्या तक्रारींवरून असं दिसत की, विकास दुबे आणि गुन्हेगारी जगत याचा संबंध ३० वर्षांपूर्वीपासूनचा आहे. यातील वेगवेगळ्या प्रकरणात विकास दुबेला अटकही झाली. पण, एकाही प्रकरणात शिक्षा झालेली नव्हती.

२००१ साली विकास दुबे याच्यावर पोलीस ठाण्यात घुसून भाजपाचे राज्यमंत्री संतोष शुक्ला यांची हत्या केल्याचा आरोप लावण्यात आला होता. संतोष शुक्ला यांची हत्या हायप्रोफाईल प्रकरण होतं. पण एकाही पोलिसानं विकास दुबेविरुद्ध साक्ष दिली नाही. पुढे न्यायालयात कोणतेच पुरावे सादर न झाल्यानं विकास दुबेची सुटका झाली

नंतर २००० साली कानपूरच्या शिवली ठाणे हद्दीत येणाऱ्या ताराचंद इंटर कॉलेजचे सहव्यवस्थापक सिद्धेश्वर पांडेय यांची हत्या झाली. त्या प्रकरणातही विकास दुबेच नवा नोंदवण्यात आलं होतं. पोलिसात दाखल झालेल्या तक्रारीनुसार २००० सालीच विकास दुबे याच्यावर रामबाबू यादव यांच्या खुनाचा कट रचल्याचा आरोप ठेवण्यात आला होता. पुढे २००४ मध्ये एका केबल व्यावसायिकाच्या हत्येमध्येही विकास दुबेच नाव आलं होतं. यातील अनेक प्रकरणांमध्ये विकास दुबेला अटक झाली. पण, प्रत्येकवेळी तो जामिनावर सुटला.

२०१३ मध्येही एका खून प्रकरणात विकास दुबेच नाव आलं. तसेच २०१८मध्ये चुलत भाऊ अनुराग यांच्यावर जिवघेणा हल्ला केल्याचा आरोप दुबेवर ठेवण्यात आला होता. यासंदर्भात अनुरागच्या पत्नीनं विकास दुबेसह चार लोकांविरोधात तक्रार दिली होती.

विकास दुबे याचे अनेक राजकीय नेत्यांसोबत संबंध असल्याचाही आरोप होता.

विकास दुबेविरुद्ध चौबेपूर पोलीस ठाण्यात दाखल करण्यात आलेली सर्व प्रकरण जमीन गैरव्यवहाराशी संबंधित आहेत. या जमिनीच्या व्यवहारातूनच विकास दुबे यानं कोट्यवधी रुपये कमावले होते.

विठूरमध्येच त्याची शाळा, महाविद्यालयेही आहेत. गावातच नाही, तर आजूबाजूच्या गावातही विकास दुबेचा दबदबा होता. जिल्हा पंचायत आणि अनेक गावांमधील सरपंच निवडणुकांमध्ये दुबेच्या आवडीनिवडीला महत्त्व द्यायची.

बिकरू गावामध्ये गेल्या १५ वर्षांपासून सरपंचाची बिनविरोध निवड होत आहे. विकास दुबे याच्या कुटुंबातील लोकच गेल्या १५ वर्षांपासून पंचायत निवडणूक जिंकत आहेत.

याच विकास दुबेला २ जुलै रोजी पोलीस अटक करण्यासाठी गेले असता त्यांच्यावर अंदाधुंद गोळीबार करण्यात आला. यामध्ये आठ पोलीस कर्मचारी शहीद झाले होते.

अखेर पोलिसांनी कारवाई करत विकास दुबेला चकमकीत ठार केलं आहे.

विकास दुबेला ठार केल्याने एकीकडे प्रश्नचिन्ह उपस्थित केलं जात असताना शहीद पोलिसांचे कुटुंबीय कौतुक करत आहेत.