नीरा नदीतून उजनी धरणात जमिनीखालून पाणी घेऊन जाण्यासाठी २४ किलोमीटर लांबीचा बोगदा खोदण्याचे काम ८० टक्के पूर्ण झाले आहे. (सर्व छायाचित्रे - कालिदास म्हेत्रे)

पाच विविध राज्यातील सुमारे ३००० हजार कामगार त्यासाठी रात्रंदिवस काम करीत आहेत.

जमिनीखाली सरासरी ४५ मीटर खोल हे काम केले जात आहे. याची किमान खोली १३० फूट तर कमाल खोली २९० फूट आहे.

साधारणपणे २४ मजली इमारतीच्या उंची इतक्या खोलवर हे काम सुरू आहे.

बोगद्यात उतरण्यासाठी आणि आतील खोदकाम झालेले साहित्यवर काढण्यासाठी २४ किलोमीटरवर आठ ठिकाणी १५ बाय ८ मीटर आकाराच्या विहिरी खोदण्यात आल्या आहेत.

या विहिरीच्या माध्यमातून क्रेनच्या सहाय्याने बोगद्यात जेसीबी, पोकलेन, ट्रक, जीप खाली सोडण्यात आल्या आहेत. एका वेळी बोगद्यात दोन ट्रक सहज ये जा करू शकतात.

हा बोगदा म्हणजे अभियांत्रिकीचा अद्भुत आविष्कार आहे. दोनशे फूट खोलीवर ऑक्सिजनचे प्रमाण कमी पडू नये यासाठी वरून दोन मोठ्या ब्लॉअरद्वारे आतमध्ये ऑक्सिजन सोडले जाते.

सहा तास ड्रीलिंग, त्यानंतर सहा तास त्यात जिलेटीन भरण्याचे काम त्यानंतर स्फोट आणि सर्वात शेवटी स्फोटामुळे मोकळे झालेले साहित्य वर काढणे असा सध्या इथला नित्यक्रम आहे.

दरमहा १२० मीटर काम या पद्धतीने पूर्ण केले जात आहे.

कृष्णा खोऱ्यातील २१ टीएमसीपैकी सात टीएमसी पाणी मराठवाड्याला मिळण्याचा मार्ग आता या बोगद्यामुळं मोकळा झाला आहे.