Photos : आनंद दिघेंनी सुरु केलेल्या टेंभीनाक्यातील नवरात्रोत्सव मंडळाला मुख्यमंत्री शिंदेंनी दिली भेट, पाहा फोटो

शारदीय नवरात्रोत्सवाला आजपासून सुरूवात झाली आहे. गेले दोन वर्ष करोनामुळे सगळेच सण-उत्सव साधेपणाने साजरे करण्यात आले. परंतु, यावर्षी कोणत्याही निर्बंधांविना उत्सव साजरे होत असल्यामुळे भाविकही आनंदात आहेत. ठाण्यातही नवरात्रोत्सवाची धामधूम पाहायला मिळते. आनंद दिघे यांनी सुरू केलेल्या टेंभीनाका येथील देवीची दरवर्षी मोठ्या श्रद्धेने पूजा केली जाते. १९७८ सालापासून सुरू करण्यात आलेल्या टेंभीनाका येथील नवरात्रोत्सवाची फार मोठी परंपरा आहे. अंबे धर्मादाय विश्वस्त संस्थेच्या वतीने दरवर्षी टेंभीनाका येथे मोठ्या उत्साहाने नवरात्रोत्सव साजरा करण्यात येतो. महाराष्ट्राला ठाणे जिल्ह्याचे मुख्यमंत्री मिळाल्याने यावर्षी ठाण्यातील नवरात्रोत्सवातील उत्साह पाहण्यासारखा असणार आहे. घटस्थापनेच्या पूर्वसंध्येला मुख्यमंत्री एकनाथ शिंदेंनी टेंभीनाका येथील नवरात्रोत्सव मंडळाला भेट दिली. शिंदेंनी स्वत: नवरात्रोत्सव मंडळातील दुर्गेश्वरी मातेच्या सभा मंडपाच्या कामाची पाहणी केली. यावर्षी दुर्गेश्वरीच्या स्वागतासाठी खास शिखर मंदिराची प्रतिकृती उभारण्यात आली आहे. यावेळी त्यांच्यासह ठाणे जिल्हाप्रमुख, शिवसेना प्रवक्ते नरेश म्हस्के, शहरप्रमुख हेमंत पवार, माजी नगरसेवक, टेंभीनाका शिवसेना शाखेचे शाखाप्रमुख निखिल बुडजडे तसेच शिवसेनेचे सर्व प्रमुख पदाधिकारी आणि कार्यकर्ते उपस्थित होते. (सर्व फोटो : एकनाथ शिंदे, दुर्ग दुर्गेश्वरी टेंभीनाका/ इन्स्टाग्राम) (हेही पाहा >> PHOTOS: शिवाजी पार्कवर ठाकरे गटाला दसरा मेळाव्याची परवानगी, न्यायालयाच्या निर्णयानंतर नेत्यांनी दिल्या ‘या’ प्रतिक्रिया )