'सन्माननीय राज' आणि 'सन्माननीय उद्धव…', ठाकरे बंधूंनी एकमेकांचा उल्लेख करत केली भाषणाला सुरुवात

शिवसेना (ठाकरे) व मनसेने आयोजित केलेल्या विजयी मेळाव्याला संबोधित करताना उद्धव ठाकरे यांनी राज ठाकरे यांच्याबरोबर युतीचे संकेत दिले आहेत.(Express Photo by Amit Chakravarty) "राजने भाषणाच्या सुरुवातीला माझा उल्लेख सन्माननीय केला, त्यामुळे माझ्या भाषणाची सुरुवात देखील सन्माननीय राज ठाकरे अशीच आहे", असं उद्धव ठाकरे यांनी म्हटलं. "आमच्या दोघांमधील अंतरपाठ अण्णाजीपंतांनी दूर केला. आता तुमच्याकडून अक्षता टाकण्याची अपेक्षा नाही. आम्ही दोघे एकत्र आलोय, एकत्र राहण्यासाठी", असं उद्धव ठाकरे यांनी म्हटलं. शिवसेना (ठाकरे) व मनसेच्या विजयी मेळाव्याला संबोधित करताना राज ठाकरे यांनी भाषणाच्या सुरुवातीला सन्माननीय उद्धव ठाकरे असा केला. हिंदी सक्ती ही मुंबई स्वतंत्र करण्याची चाचपणी असल्याची घणाघाती टीका या मेळाव्यात बोलताना मनसे अध्यक्ष राज ठाकरे यांनी केली आहे. सत्ताधाऱ्यांना नेमकं काय आणि कोणासाठी करायचं आहे? असा सवाल राज ठाकरे यांनी या मेळाव्यातून विचारला. "कोणाची माय व्यालीय त्यांनी महाराष्ट्राला, मुंबईला हात घालून दाखवावा. काय मजाक वाटला काय? आम्ही शांत आहोत याचा अर्थ गां** नाहीयोत”, अशा शब्दांत राज ठाकरे यांनी इशारा दिला. ‘तुमच्या हातात सत्ता असेल, पण ती सत्ता विधानभवनात, आमच्याकडे सत्ता रस्त्यावर आहे’, असं म्हणत राज ठाकरे यांनी भारतीय जनता पक्षाला मोठा इशारा दिला