Photos: एप्रिलच्या सुरुवातीलाच विजांच्या कडकडाटासह पुण्यात मुसळधार पाऊस; रस्त्यांना नदीचं स्वरुप

Heavy Rain In Pune Water Logging: पुणे शहर आणि परिसराला पावसाने अक्षरश: झोडपून काढले आहे. दुपारपासूनच मध्यवर्ती शहरासह उपनगरे आणि पिंपरी-चिंचवड परिसरात मेघगर्जना, विजांचा कडकडाट आणि सोसाट्याच्या वाऱ्यासह मुसळधार पावसाने हजेरी लावली. हवामान विभागाने दिलेल्या माहितीनुसार, वातावरणाच्या वरच्या स्तरात (५ ते १० किमी उंचीवर) पश्चिमेकडून दक्षिणेकडे थंड हवेचा प्रवाह वेगाने वाहत आहे. हा प्रवाह नागमोडी स्वरूपाचा असल्याने अरबी समुद्र आणि बंगालच्या उपसागराकडून येणारे बाष्पयुक्त वारे यात मिसळले जात आहेत. यामुळेच शहरात पाऊस आणि गारपिटीसाठी पोषक वातावरण निर्माण झाले आहे. ३० मार्च रोजी बाणेरसह विविध भागात गारपीट झाली होती. विशेष म्हणजे, शिवाजीनगर येथे नोंदवण्यात आलेला २६.६ मिमी पाऊस हा गेल्या दशकभरातील सर्वाधिक पाऊस ठरला आहे. बुधवारी विश्रांती घेतल्यानंतर गुरुवारी दुपारी २ वाजल्यापासून वातावरणात पुन्हा वेगाने बदल झाले. आकाश ढगांनी व्यापून आल्यानंतर शहराच्या मध्यवर्ती पेठांसह कात्रज, औंध, बाणेर, बिबवेवाडी, कोथरूड, शिवाजीनगर आणि उंड्री भागात पावसाचा जोर वाढला. या मुसळधार पावसामुळे रस्त्यांवरून ओढ्यासारखे पाणी वाहत होते, तर सखल भागात पाणी साचल्याने वाहनचालकांना मोठ्या त्रासाला सामोरे जावे लागले. अचानक आलेल्या या पावसामुळे पुणेकरांची मोठी तारांबळ उडाली. (सर्व फोटो - अरुल होरायझन, इंडियन एक्सप्रेस)