Photos: परंपरेचा सन्मान! छत्रपती संभाजीराजे यांच्या हस्ते संत तुकाराम महाराज पालखीचे पूजन

मंगळवार, ७ जुलै रोजी देहूनगरीतील भक्तिमय वातावरणात पालखी प्रस्थान सोहळ्याने या वर्षीच्या आषाढी वारीस प्रारंभ झाला. वारकरी संप्रदायाच्या अखंड श्रद्धेचे प्रतीक असलेल्या जगद्गुरू संतश्रेष्ठ तुकाराम महाराजांच्या पालखी प्रस्थान पूजनाचा बहुमान यंदा छत्रपती संभाजीराजे यांना लाभला. या मंगल समयी छत्रपती संभाजीराजे यांनी पालखीस स्वराज्याचा परंपरागत 'भगवा ध्वज' अर्पण केला. या सोहळ्यासाठी व पालखी पूजनासाठी श्री संत तुकाराम महाराज संस्थान, देहू यांच्या वतीने त्यांना सपत्नीक आमंत्रित करण्यात आले होते. संयोगिताराजे छत्रपती व युवराज शहाजी छत्रपती यांच्यासमवेत या सोहळ्यास उपस्थित राहता आले, हा आमच्यासाठी अत्यंत गौरवपूर्ण क्षण होता. हा अभूतपूर्व सन्मान दिल्याबद्दल श्री संत तुकाराम महाराज संस्थानच्या सर्व पदाधिकाऱ्यांचे व ग्रामस्थांचे मनःपूर्वक आभार! प्रस्थान सोहळ्यामुळे संपूर्ण देहूनगरी भक्ती आणि चैतन्याच्या रंगात न्हाऊन निघाली होती. संत तुकाराम महाराजांची पालखी आज (बुधवारी) आकुर्डी येथे मुक्कामी असणार आहे. दरम्यान, पुणे जिल्ह्यासह मावळ, देहू व आळंदी परिसरात मुसळधार पाऊस कोसळत आहे. (सर्व फोटो सौजन्य : छत्रपती संभाजीराजे/इन्स्टाग्राम)