भारताचा ७३ वा प्रजासत्ताक दिन आज देशभरात उत्साहात साजरा केला जात आहे.
प्रजासत्ताक दिनानिमित्त राजपथावर होणाऱ्या संचलनामध्ये या वर्षीही महाराष्ट्राच्या चित्ररथाने सर्वांचं लक्ष वेधून घेतलं.
राजपथावर झालेल्या संचलनात यंदा ‘महाराष्ट्रातील जैवविविधता’ या विषयावर आधारित चित्ररथ सादर करण्यात आला.
या चित्ररथावर सातारा जिल्ह्यातील कास पठारावरील फुले व प्राण्यांच्या प्रजातीचा समावेश करण्यात आला.
कास पठाराचा चित्ररथात समावेश झाल्याने सातार्‍यासाठी ही बाब भूषणावह ठरली.
कास पठाराला फुलांची व्हॅली म्हणूनही ओळखले जाते.
पश्चिम घाटावरील जैवविविधता समृद्ध क्षेत्र म्हणून २०१२ मध्ये संयुक्त राष्ट्र शैक्षणिक, वैज्ञानिक आणि सांस्कृतिक संघटना (युनेस्को)ने जागतिक नैसर्गिक वारसास्थळ घोषित केले होते.
हे विविध प्रकारच्या हंगामी वन्य फुलांसाठी आणि स्थानिक फुलपाखरांच्या प्रजातींसाठी ओळखले जाते.
फुलांच्या ८५० पेक्षा जास्त प्रजाती या पठारावर आढळून येतात. ज्यात ऑर्किड, झुडूप आणि मांसाहारी वनस्पतींचा समावेश आहे. त्यामुळे हे एक लोकप्रिय पर्यटनस्थळ बनले आहे.
कास पठाराप्रमाणेच माळढोक पक्षी, ग्रेट इंडियन बस्टर्ड आणि खेकड्याच्या नवीन शोधलेल्या प्रजातींची प्रतिकृती देखील आहे.
याशिवाय वाघ, फ्लेमिंगो, मासे, गिधाड आणि घुबडाची प्रतिकृती आहे.
चित्ररथावरील महाराष्ट्राचा राज्यपक्षी ‘हरियाल’च्या प्रतिकृतीवर अनेकांच्या नजरा खिळल्या. शेकरू हा राज्यप्राणी तर हरियाल हा राज्यपक्षी आहे.
चित्ररथाच्या पुढच्या भागात महाराष्ट्राचं राज्य फुलपाखरू ‘ब्ल्यू मॉरमॉन’च्या आठ फूट उंचीच्या देखण्या प्रतिकृतीने चित्ररथाची शोभा वाढवली.
राज्याच्या चित्ररथात फुलपाखराचे आठ फूट उंच आणि सहा फूट रुंद मॉडेल असेल.
प्रतिकृती घेऊन जाणार्‍या स्टेजला जारुल आणि ताम्हण या राज्य फुलांनी सुशोभित केले आहे.
