Maharashtra Political Crisis Updates: भाजपाने आपल्या धक्कातंत्र कायम ठेवत शिवसेनेचे बंडखोर नेते एकनाथ शिंदे हे मुख्यमंत्री असतील अशी आज (३० जून) घोषणा केली.
राजभवनामध्ये राज्यपाल भगतसिंह कोश्यारी यांची भेट घेतल्यानंतर माजी मुख्यमंत्री देवेंद्र फडणवीस यांनी पत्रकार परिषदेमध्ये ही घोषणा केली.
आज संध्याकळी एकनाथ शिंदे राज्याचे नवे मुख्यमंत्री म्हणून शपथ घेतील.
भाजपाने मनाचा मोठेपणा दाखवून बाळासाहेबांच्या शिवसैनिकाला पाठिंबा दिला असे एकनाथ शिंदे म्हणाले.
एकनाथ शिंदे यांचा जन्म ४ फेब्रुवारी १९६४ रोजी साताऱ्यातील दरे या गावी झाला.
घरची परिस्थिती बेताची असल्यामुळे त्यांना लहान वयातच मुंबई गाठावी लागली.
आर्थिक अडचणींमुळे एकनाथ शिंदेंनी मासे विकणाऱ्या, दारूच्या कंपनीतही काम केले आहे.
एके काळी एकनाथ शिंदे ठाण्यात रिक्षाचालक होते.
वयाच्या अवघ्या १८व्या वर्षापासूनच त्यांनी शिवसेनेसाठी काम करायला सुरुवात केली.
ठाण्यातील शिवसेनेचे आधारस्तंभ असलेल्या आनंद दिघे यांचे शिंदे निकटवर्तीय होते.
शिवसेनेच्या प्रत्येक आंदोलनात ते सहभागी व्हायचे.
महाराष्ट्र-कर्नाटक सीमा आंदोलनात त्यांनी पोलिसांचा लाठीचार्जही सहन केला आहे.
शिंदेंच्या नावावर १८ गुन्हे दाखल आहेत.
परंतु, यातील एकातही त्यांची गुन्हेगारी सिद्ध झालेली नाही.
वयाच्या २०व्या वर्षी ते शिवसेनेचे शाखाप्रमुख बनले.
त्यानंतर शिंदे नगरसेवकही झाले.
२००१ मध्ये मात्र शिंदेंवर दु:खाचा डोंगर कोसळला होता.
पोटच्या दोन लहान मुलांच्या अपघाती मृत्यूमुळे त्यांनी राजकारण सोडण्याचा निर्णय घेतला होता.
शिंदेंचे राजकारणातील गुरू आनंद दिघे यांनी त्यांना सावरले.
ठाणे महापालिकेचे सभागृह नेतेपद देऊन एकनाथ शिंदेंना व्यग्र ठेवण्याचा त्यांनी पुरेपूर प्रयत्न केला.
आनंद दिघेंमुळे मोठ्या प्रसंगातून सावरल्याचं शिंदेंनी अनेकदा मुलाखतीतून सांगितले आहे.
त्यानंतर मात्र शिंदेंनी पुर्णपणे आपलं लक्ष कामावर केंद्रित केले.
२००४ मध्ये शिंदे यांनी पहिल्यांदा विधानसभेची निवडणूक लढवली.
त्यानंतर सलग चार वेळा ते कोपरी पाचपाखाडी मतदारसंघातून आमदार म्हणून निवडूण आले आहेत.
शिवसेनेने भाजपासोबत युती केल्यानंतर त्यांना मंत्रीपदही मिळाले.
२०१५-१९ दरम्यान त्यांनी सार्वजनिक बांधकाम मंत्री म्हणून काम पाहिले आहे.
२०१९च्या सुरुवातीपासून त्यांनी काही महिने आरोग्य खात्याची देखील जबाबदारी सांभाळली.
२०१९मध्ये महाविकास आघाडी सरकारमध्ये शिवसेनेकडून मुख्यमंत्री पदासाठी त्यांचे नाव चर्चेत होते.
परंतु, त्यांना नगरविकास आणि सार्वजनिक बांधकाम विकास या खात्यावरच समाधान मानावे लागले.
(सर्व फोटो सौजन्य : एकनाथ शिंदे / ट्विटर)
