क्रीडा संघटनांवरील अजित दादांच्या प्रभुत्वाला, आव्हान देण्याचा प्रयत्न नागपुरातूच झाला होता

राज्यातील लोकप्रिय नेते अजितदादा पवार यांच्या आकस्मिक जाण्याने संपूर्ण महाराष्ट्र हळहळला, महाराष्ट्र सरकारने दुखवटा जाहीर केला, भाजपने पानभर जाहिराती देऊन दादांना श्रद्धांजली अर्पण केली.

ajit pawar death triggers tributes from government and bjp print politics news

क्रीडा संघटनांवरील अजित दादांच्या प्रभुत्वाला, आव्हान देण्याचा प्रयत्न नागपुरातूच झाला होता (लोकसत्ता टिम)

नागपूर – राज्यातील लोकप्रिय नेते अजितदादा पवार यांच्या आकस्मिक जाण्याने संपूर्ण महाराष्ट्र हळहळला, महाराष्ट्र सरकारने दुखवटा जाहीर केला, भाजपने पानभर जाहिराती देऊन दादांना श्रद्धांजली अर्पण केली. ‘एक दिलदार’ मित्र गमावल्याची प्रतिक्रिया मुख्यमंत्री देवेंद्र फडणवीस यांनी व्यक्त केली. हे सारे चित्र पाहता अजित पवार हे भाजपसाठी केवळ सहकारी नव्हते, तर त्यांचे नेतृत्वही या पक्षाने स्वीकारल्याचा संदेश यातून दिसत होता. . मात्र हीच कथा काही महिन्यांपूर्वी पूर्णपणे वेगळी होती. याच ‘दिलदार’ मित्राच्या क्रीडा संघटनांवरील प्रभुत्वाला आव्हान देण्याचा प्रयत्न भाजपने केला होता व त्याला नागपूरचे पाठबळ होते. महाराष्ट्र ऑलिम्पिक संघटनेची ही निवडणूक होती व नागपूरचे आमदार संदीप जोशी हे थेट दादांच्या गटाविरोधात उभे ठाकले होते.

अजितदादा हे फक्त राजकीय नेते किंवा उत्तम मंत्रीच नव्हते, त्यांच्या कामाचा क्रीडाक्षेत्रातही तितकाच दबदबा होता , अनेक राष्ट्रीय क्रीडा संघटनांचे ते प्रमुख होते. . त्यामुळे त्यांच्या अशा अकाली जाण्याने फक्त राजकीय क्षेत्रालाच धक्का बसला , असे नाही तर क्रीडा व्यवस्थापनाच्या क्षेत्रातही मोठी पोकळी निर्माण झाली आहे. राजकारण कुठल्याही क्षेत्रातील असो त्यात डावपेच आलेच. दादांना सत्तेच्या राजकारणात अनेकदा शह देण्याचा प्रयत्न झाला, पण तो यशस्वी होऊ शकला नाही कारण शरद पवार यांच्यासारखी मोठी शक्ती त्यांच्या पाठीशी होती. काँग्रेस-राष्ट्रवादीच्या सत्ताकाळात क्रीडा संघटनांच्या राजकारणातही दादांना कोणी आव्हान दिले नाही. पण २०१४ नंतर स्थिती बदलली. भाजपसोबत लढता लढता अजितदादा भाजपसोबतच गेले, भाजपसोबत जाण्याचा निर्णय हा अजित पवार यांच्यासाठी तात्कालिक राजकीय गरज असली, तरी दीर्घकाळात तो अस्वस्थ करणारा ठरला. कारण भाजपची राजकीय संस्कृती सहअस्तित्वापेक्षा वर्चस्वाला अधिक महत्त्व देते. त्यामुळे राजकारण असो वा क्रीडाक्षेत्र—अजित पवार यांच्या प्रभावाला मर्यादा घालण्याचे प्रयत्न सातत्याने होत राहिले.

. क्रीडाक्षेत्राच्या बाबतीत सांगायचे झाले तर नोव्हेंबर २०२५ मध्ये झालेल्या महाराष्ट्र ऑलम्पिक संघटनेची निवडणूक हे त्यांचे ताजे उदाहरण मानता येईल. अजितदादां अध्यक्ष असलेल्या या संघटनेच्या निवडणुकीत ण भाजपने त्यांचे पॅनल उभे केले होते. अजित पवार यांच्या विरोधात मुख्यमंत्री देवेंद्र फडणवीस यांचे कट्टर समर्थक, केंद्रीय राज्यमंत्री मुरलीधर मोहोळ यांनी अध्यक्षपदासाठी अर्ज भरला होता तर मुख्यमंत्र्यांचेच दुसरे कट्टर समर्थक व नागपूरकर आमदार संदीप जोशी यांनीही उपाध्यक्षपदासाठी अर्ज दाखल केला होता.

हेही वाचा

Samruddi Mahamarg: समृद्धी महामार्गावर आजपासून तासभर थांबा

या निवडणुकी दरम्यानही भाजपने विशेषत: संदीप जोशी यांनी अजितदादा यांच्यावर भ्रष्टाचाराचे आरोप केले होते. भाजपचे विदर्भातील माजी खासदार रामदास तडस यांनीही दादांवर टीका केली होती. या निवडणुका झाल्या नाहीत. अजितदादांची पुन्हाअध्यक्षपदी बिनविरोध निवड झाली. पण त्यांना त्यांच्यावर टीका करणाऱ्यांना कार्यकारिणीत सोबत घ्यावे लागले. या निवडणुकीच्या निमित्ताने झालेल्या भ्रष्टाचाराच्या आरोपामुळे दादाच्या बाबतीत संशय निर्माण करण्यात आला. दादांच्या निधनानंतर संदीप जोशी यांनीही दुख: व्यक्त करताना क्रीडाक्षेत्र अनाथ झाल्याची भावना व्यक्त केली.

ज्या सिंचन घोटाळ्याचा आरोप झाला तो विदर्भाचाच व त्यावरून सर्वाधिक आरोप करणारा पक्ष म्हणजे भाजपच. त्याच भाजप सत्ताकाळात दादांना या प्रकरणातून क्लिनचिट मिळाली असली तरी त्याच्या प्रतिमेला गेलेले तडे कायम राहिले होते. म्हणूनच शिवसेना नेते संजय राऊत यांनी अजितदादांना श्रद्धांजली देणाऱ्या भाजपच्या जाहिरातीवर टीका करताना भाजपने अजितदादांवर केलेले भ्रष्टाचाराचे आरोप मागे घ्यावे ही केलेली मागणी संयुक्तिक ठरते

क्रीडा संघटनांवरील अजित दादांच्या प्रभुत्वाला आव्हान देण्याचा प्रयत्न नागपुरातूच झाला होता