अजित पवार, महेश लांडगे यांच्यातील संघर्ष टोकाला

आमदार लांडगे यांनी अजित पवारांचा एकेरी उल्लेख करत १९९१ पासून आतापर्यंतची संपत्ती किती झाली, ४० साखर कारखाने कसे झाले, शहरात येऊन आम्हाला शहाणपणा, लंगोट बांधायला शिकवण्याची गरज नाही. आम्ही बांगड्या घातलेल्या नाहीत. शहरातील नेत्यांना पायापाशी ठेवले, या शहरातून त्यांना हद्दपार करण्यासाठीची ही निवडणूक आहे. ‘मी स्वाभिमानी पिंपरी-चिंचवडकर’ असे भावनिक आवाहन लांडगे नागरिकांना करत आहेत. प्रचाराच्या शेवटच्या चार दिवसांत हा संघर्ष कोणते वळण घेतो, हे पाहणे महत्त्वाचे ठरणार आहे.

पिंपरी-चिंचवड शहरावरील अजित पवार यांचे २५ वर्षांचे वर्चस्व २०१७ मध्ये आमदार कै. लक्ष्मण जगताप आणि आमदार महेश लांडगे यांच्यामुळे संपुष्टात आले. या निवडणुकीत लांडगे यांनी ‘नको बारामती, नको भानामती’, ‘शहरातील निर्णय शहरातच होणार’ असे फलक लावून पवार यांना विरोध सुरू केला. जगताप यांचे निधन झाल्यानंतर कारभारीपद महेश लांडगे यांच्याकडे आले. तेव्हापासून लांडगे आणि अजित पवार यांच्यातील संघर्षात वाढ झाली. लांडगे यांना मीच स्थायी समितीचे अध्यक्ष केल्याचे पवारांकडून सांगितले जात आहे.

भाजपबरोबर राज्यातील सत्तेत सहभागी असलेल्या पवार यांनी पिंपरी-चिंचवड महापालिकेची निवडणूक प्रतिष्ठेची केली असून, शहरात ठाण मांडले आहे. भाजपच्या स्थानिक नेत्यांना सत्तेची मस्ती, नशा, माज आला आहे. काही लोकांची मालमत्ता कशी वाढली, त्यांनी काय चमत्कार केला की ते कोट्यधीश झाले. निविदा रक्कम फुगवून, रिंग करून कामे लाटली. लुटारूंची टोळी निर्माण झाली असून, दिवसाढवळ्या दरोडे टाकले जात आहेत. भ्रष्टाचारातून परिवाराला मोठे करण्याची राक्षसी भूक लागल्याचे गंभीर आरोप केले.

भ्रष्टाचाराचा ‘आका’ संपविणार असल्याचे सांगितले. आरोपांचा सर्व रोख आमदार महेश लांडगे यांच्यावर आहे. भोसरीतील शीतलबागेच्या पादचारी उड्डाणपुलाचा ७० लाखांचा खर्च सात कोटींवर कसा गेला असा सवालही पवार यांनी केला आहे. त्यावरून आमदार महेश लांडगे यांनीही आक्रमक भूमिका घेण्यास सुरुवात केली आहे. अजित पवारांचा एकेरी उल्लेख करून विविध गंभीर आरोप केले. स्थानिक मुद्दा प्रचाराच्या केंद्रस्थानी आणला.

उपमुख्यमंत्री अजित पवार यांनी सभा घेतली त्या पिंपरीगावातच आमदार महेश लांडगे यांनी जाहीर सभा घेत पवार यांना एकेरी भाषेत प्रत्युत्तर दिले. स्थानिक नेतृत्वाला मोठे होऊ दिले नाही. बाहेरून येऊन स्थानिकांमध्ये वाद लावून स्वार्थ साधला. स्वाभिमानी पिंपरी-चिंचवडकर आता एक झाले आहेत. त्यामुळे १२८ उमेदवार त्यांना उभे करता आले नाहीत. डोळे मिटून बसून आत्मपरीक्षण करावे. मी वाकड्यात गेलो. तुमच्यात किती ताकद आहे, ते पाहू देत. आमच्याशी लढाईची भाषा करायची नाही.

तुम्ही कार्यक्रम करता, तर आम्ही काही बांगड्या घातल्या आहेत का? आम्ही आता ताकदवान, सक्षम झालो आहोत. पिंपरी-चिंचवडमध्ये काय पाहिजे हे बारामतीला राहून कळणार आहे का? २५ वर्षे पालकमंत्री होता, काय केले? त्यांना शहरात केवळ मीच दिसतो. ३० वर्षे लोक यांच्या दारात उभे होते. आता त्यांना तिकिटे घेऊन शहरात वाटायला यावे लागते. शहरातील नेत्यांना पायापाशी ठेवले.

पिंपरी-चिंचवड एकच असून, एक ठेवायला सांगणारे तुम्ही कोण आहात? मी म्हणजे पिंपरी-चिंचवडकर असा त्यांचा समज झाला आहे. मी घाबरलो नाही. २०१४ ला तुमच्या पक्षाविरोधात अपक्ष लढलो आणि निवडून आलो. उधळलेला वारू रोखण्याची ताकद आमच्यात आहे.  दात काढलेल्या वाघासारखी त्यांची परिस्थिती झाली आहे. माझ्या नादाला लागू नये. बाहेरून येऊन स्वाभिमानात हात घालायचा नाही. माझ्यावर आरोप केले, तर सगळेच काढण्याचा इशारा आमदार लांडगे यांनी दिला.

मामेसासरे विलास लांडे यांना एकत्र येण्याची साद

पंढरपूर येथील श्री विठ्ठल-रुक्मिणी मंदिर समितीवर घेण्याची मागणी माजी आमदार विलास लांडे यांनी केली. पण, अद्याप ते पद त्यांना मिळत नाहीत. त्यामुळे मामांनी सोबत यावे. त्यांना बुक्का लावणे बंद करावे. मतभेद असू शकतात. आपले वाद येथेच राहू द्यावेत. वापर करून सोडून देण्यापेक्षा एक राहूयात, असे आवाहन आमदार लांडगे यांनी विलास लांडे यांना केले.

मुख्यमंत्र्यांचा पाठिंबा  आमदार लांडगे यांना भाजपच्या प्रदेश नेतृत्वाचे पाठबळ आहे. मुख्यमंत्री देवेंद्र फडणवीस, भाजपचे नेतृत्व पूर्णपणे माझ्या पाठीमागे आहे. त्यांची पूर्ण ताकद बरोबर असल्याचेही लांडगे यांनी सांगितले.