आगामी लोकसभा निवडणूक अवघ्या काही महिन्यांवर येऊन ठेपली आहे. या निवडणुकीत पक्षाकडून तिकीट मिळावे यासाठी अनेक नेते आपापल्या पातळीवर प्रयत्न करीत आहेत. ज्या नेत्यांना तिकीट मिळणार नाही, असे वाटतेय, ते नेते अन्य मार्ग चोखाळत आहेत. केंद्रीय मंत्री राहिलेले हरियाणातील भाजपाचे नेते चौधरी बिरेंद्रसिंह हेदेखील अशाच नव्या मार्गाचा शोध घेत आहेत. त्याचाच एक भाग म्हणून त्यांनी २ ऑक्टोबर रोजी एका सभेचे आयोजन केले आहे. या सभेमध्ये भाजपाचा झेंडा किंवा बॅनर नसेल. याच कारणामुळे सिंह यांच्या या सभेची हरियाणात चर्चा होत आहे.
भाजपाचा झेंडा घेऊन न येण्याचे आवाहन
चौधरी बिरेंद्रसिंह हे भाजपाचे नेते आहेत. त्यांनी याआधी केंद्रात मंत्रिपदही भूषवलेले आहे. त्यांनी २ ऑक्टोबर रोजी एका विशेष सभेचे आयोजन केले आहे. या सभेत येणाऱ्या कार्यकर्त्यांना भाजपाचा झेंडा घेऊन येऊ नये, असे सांगण्यात आले आहे. सभास्थळीदेखील भाजपाचा उल्लेख असलेला कोणताही बॅनर नसेल. या सभेदरम्यान फक्त भारताचा राष्ट्रध्वज घेऊन यावे, असे कार्यकर्त्यांना सांगण्यात आले आहे. ‘मेरी आवाज सुनो’ असे नाव या सभेला देण्यात आले असून, ‘बिरेंद्रसिंह के साथी’ या ग्रुपने या सभेचे आयोजन केले आहे.
मराठीतील सर्व सत्ताकारण बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Haryana bjp leader chaudhary surendra singh organise rally without bjp banner and flag prd
