RSS च्या कार्यक्रमात सलमान खानच्या उपस्थितीने वाद; सत्ताधारी अन् विरोधकांमध्ये का जुंपली?

सलमान खानबद्दल मोहन भागवत यांचे विधान

राष्ट्रीय स्वयंसेवक संघाच्या या कार्यक्रमाला सरसंघचालक मोहन भागवत उपस्थित होते. यावेळी त्यांनी केलेल्या भाषणात, संघटनेची उत्क्रांती आणि भारतीय समाजावर झालेला तिचा परिणाम यावर त्यांनी लक्ष केंद्रित केले. भागवत यांनी तरुणांवरील सलमान खानच्या प्रभावाचाही उल्लेख केला. ते म्हणाले, “कॉलेजमधील तरुण मुले सलमान खानच्या फॅशनची कॉपी करतात. त्यांना याचे कारण विचारले असता, त्यांना माहीत नसते आणि केवळ सलमान करतोय म्हणून ते करतात. समाजात चांगल्या मूल्यांच्या संदर्भाने वागणे ही एक ‘फॅशन’ झाली पाहिजे,” असेही ते म्हणाले. सेलिब्रिटी संस्कृतीचा वापर करून समाजात सकारात्मक बदल घडवता येऊ शकतो, असेही त्यांनी आपल्या भाषणात म्हटले.

सलमान खानच्या उपस्थितीवरून वाद

सलमान खानच्या उपस्थितीवर प्रश्न निर्माण होत असतानाच महाराष्ट्र सरकारमधील मंत्री आणि भाजपा नेते नितेश राणे यांनी उद्धव ठाकरे यांच्यावर टीका केली. “सलमान खान हा उद्धव ठाकरेंपेक्षा जास्त हिंदू आहे. त्याच्यात आरएसएसच्या कार्यक्रमाला उपस्थित राहण्याचे धाडस तरी आहे,” असे विधान राणे यांनी केले. राणे यांच्या या वक्तव्याला प्रत्युत्तर देताना समाजवादी पक्षाचे आमदार अबू आझमी यांनी भाजपावर निशाणा साधला आणि लोकप्रिय अभिनेत्यावर सरकारने दबाव आणल्याचा आरोप केला.

समाजवादी पक्षाचे नेते अबू आझमी यांनी मंगळवारी सलमान खानवर कडाडून टीका केली. सलमान खानने दबावाखाली येऊन या शताब्दी महोत्सवाला हजेरी लावली असावी, असा दावा त्यांनी केला. तसेच सत्ताधाऱ्यांचे निमंत्रण नाकारण्याचे धाडस या अभिनेत्यात नाही, असेही ते म्हणाले. पत्रकारांशी बोलताना अबू आझमी यांनी म्हटले की, सलमान खान हा एक सार्वजनिक चेहरा असल्याने सत्ताधाऱ्यांशी संबंधित निमंत्रण नाकारण्याचे स्वातंत्र्य त्याला नसावे.

ते म्हणाले, “सलमान खान एक अभिनेता आहे आणि त्याला या देशात आदराने राहायचे आहे. जर सत्ताधारी पक्षातील लोक काही सांगत असतील, तर सलमान खानमध्ये त्यांना नकार देण्याचे धाडस आहे असे मला वाटत नाही; तो सरकारी दबावाखालीच तिथे गेला असावा.” दुसरीकडे, शिवसेना (उद्धव बाळासाहेब ठाकरे) नेते संजय राऊत यांनी यावर प्रतिक्रिया देताना म्हटले की, गर्दी खेचण्यासाठी आणि संघात आता मुस्लिमांचेही स्वागत आहे हे दाखवण्यासाठी या अभिनेत्याला बोलावण्यात आले होते.

ते म्हणाले, या निमंत्रणामागे श्रद्धेपेक्षा सक्ती जास्त होती. मात्र, या कार्यक्रमाला उपस्थित असलेल्या बंगाली अभिनेत्री आणि भाजपा नेत्या रूपाली गांगुली यांनी कलाकारांवर दबाव असल्याचा दावा फेटाळून लावला. त्या म्हणाल्या, “हा काय मूर्खपणा आहे, विरोधकांचे काम फक्त विरोध करणे हेच आहे; कोणावरही कसलीही जबरदस्ती केली गेली असे मला वाटत नाही. प्रत्येकजण तिथे स्वखुशीने उपस्थित होता,” असे त्यांनी ‘एनडीटीव्ही’शी बोलताना सांगितले.

एकनाथ शिंदेंची भूमिका काय?

महाराष्ट्राचे उपमुख्यमंत्री एकनाथ शिंदे यांनी सलमान खानचे समर्थन केले. मोहन भागवत यांच्या कार्यक्रमाला उपस्थित राहण्यात काहीही गैर नसल्याचे त्यांनी म्हटले. “सलमान खान आरएसएसच्या कार्यक्रमाला गेला किंवा नाही गेला, हा कसला प्रश्न आहे? तो भारताचा नागरिक नाही का? तो त्याच्या घरी गणपती बसवतो, सर्व सण साजरे करतो, आपल्या संस्कृतीचा आदर करतो. सलमान खानने मोहन भागवत यांच्या कार्यक्रमाला जाण्यात मला काहीही चुकीचे वाटत नाही, ते योग्यच आहे,” असे शिंदे म्हणाले. “तो मुंबईचा रहिवासी आहे, त्याने मुंबईतील एका कार्यक्रमाला हजेरी लावण्याचे राजकारण करू नये,” असेही ते म्हणाले.

सलमान खानच्या आगामी चित्रपटाची चर्चा

एकीकडे आरएसएस कार्यक्रमातील उपस्थितीवरून वाद सुरू असतानाच, सलमान खान त्याच्या आगामी ‘बॅटल ऑफ गालवान’ या चित्रपटामुळेही चर्चेत आहे. एप्रिलमध्ये प्रदर्शित होणारा हा चित्रपट आता ऑगस्टपर्यंत पुढे ढकलला जाण्याची शक्यता आहे, त्यामुळे बॉक्स ऑफिसवर त्याची टक्कर सनी देओलच्या ‘लाहोर १९४७’ शी होऊ शकते. ‘बॅटल ऑफ गालवान’मधील सलमानच्या लूकवर चाहत्यांनी काही प्रश्न उपस्थित केले होते.

काहींच्या मते युद्धावर आधारित चित्रपटासाठी हा लूक खूपच ‘पॉलिश्ड’ वाटत आहे. एका कार्यक्रमात यावर बोलताना सलमान म्हणाला, “काहींना हा रोमँटिक लूक वाटत असेल, पण मी एका कर्नलची भूमिका साकारत आहे. आपल्या टीमला आणि सैनिकांना प्रोत्साहित करणाऱ्या कर्नलचा लूक असाच असतो.” दरम्यान, आरएसएस कार्यक्रमातील भेटीवर झालेल्या टीकेला या अभिनेत्याने अद्याप कोणतेही अधिकृत उत्तर दिलेले नाही.