तेव्हा तोडपाण्याचा आरोप, आता कौतुक; एकनाथ खडसेंबाबत शरद पवारांची बदलती भूमिका

वास्तविक, शरद पवार हे नेहमी सर्वपक्षीय नेत्यांचा आदर करण्यासाठी प्रसिद्ध आहेत. तसेच कोणाच्या विरोधात फारशी वैयक्तिक स्वरुपाची टीकाटिप्पणी करीत नाहीत. गोपीनाथ मुंडे, गो. रा. खैरनार यांनी पवारांच्या विरोधात यथेच्छ आरोप केले होते. पण पवारांनी कधीही वैयक्तिक स्वरुपाची किंवा पातळी सोडून टीका केली नव्हती. मात्र, खडसे यांच्यावर तोडपाणी करीत असल्याचा आरोप केला होता. पवारांच्या या आरोपांचे तेव्हा पडसाद उमटले होते. खडसे यांनी आरोपांचा इन्कार केला होता. शरद पवारांनी मागे एकदा शेतकरी नेते राजू शेट्टी यांच्यावर जातीवरून केलेली टिप्पणी अशीच गाजली होती.

खडसे यांना आमदारकी

भाजपमध्ये नाराज झालेल्या व पक्षात काही स्थान मिळण्याची शक्यता नसल्यानेच एकनाथ खडसे यांनी भाजपला रामराम ठोकून राष्ट्रवादीत प्रवेश केला होता. काही वर्षांपूर्वी तोडपाण्याचा आरोप केलेल्या खडसेंना पवारांन मानाचे स्थान दिले. त्यांना विधान परिषदेची आमदारकी दिली. मध्यंतरी खडसे हे भाजपमध्ये परतण्यास उत्सुक होते. त्यांनी नवी दिल्लीत आपला भाजप प्रवेश होईल, असे जाहीरही केले होते. आपण राष्ट्रवादी सोडणार नाही, असेही त्यांनी स्पष्ट केले होते. पण खडसे यांच्या पक्ष प्रवेशास राज्यातील नेत्यांकडून विरोध झाला. परिणामी खडसे यांचा भाजप प्रवेश होऊ शकला नाही. मग खडसे यांनी आपण राष्ट्रवादीमध्येच राहणार असल्याचे जाहीर केले.