उल्हासनगरः उल्हासनगरसारख्या लहानशा मतदारसंघात प्राथमिक प्रश्न सोडवण्यातही अपयशी ठरलेले उल्हासनगरचे विद्यमान आमदार कुमार आयलानी यांना भाजपच्या पहिल्या यादीत स्थान मिळू शकलेले नाही. पहिल्या यादीला दोन दिवस उलटले तरी कुमार आयलानी यांना उमेदवारी मिळू न शकल्याने चर्चांना उधाण आले आहे. भाजपच्या स्थानिक सर्वेक्षणातही कुमार आयलानी मागे पडल्याची माहिती भाजपच्या वरिष्ठ सुत्रांनी दिली आहे. त्यामुळे आयलानी यांचा जीव टांगणीला लागला आहे.
ठाणे जिल्ह्यातील एक व्यापारी शहर आणि बहुसंख्य सिंधी समाजाची वस्ती म्हणून उल्हासनगर शहराची ओळख आहे. शहरात गेल्या काही वर्षात कोट्यांवधींचा निधी मंजूर झाला. मात्र त्याची योग्य अंमलबजावणी न झाल्याने शहरात जवळपास सर्वच प्राथमिक सोयीसुविधांची दयनीय अवस्था आहे. गेल्या पाच वर्षात विविध विभागांतून रस्त्यांसाठी कोट्यांवधींचा निधी मंजूर झाला. मात्र त्यांचा दर्जा न राखल्याने कॉंक्रिटी रस्त्यांनाही खड्डे पडले आहेत. शहरातील विविध चौक कोंडीत सापडले आहेत. शहरातील सांडपाणी वाहून नेणारी यंत्रणा कायमच सदोष राहिली आहे. त्यामुळे भर उन्हाळ्यातही शहरातील चौक पाण्याने भरलेले असतात. शहरातील जुन्या इमारतींचा पुनर्विकासाचा प्रश्नही मार्गी लागू शकलेला नाही. शहरात दिवसेंदिवस समस्या वाढत आहेत. त्या समस्यांवर तोडगा काढण्यास स्थानिक आमदार कुमार आयलानी अपयशी ठरले. शहरातील पालिकेच्या निर्णयातही आयलानी छाप सोडू शकले नाही. वेळ मारून नेण्याचा हाच प्रकार आयलानी यांच्या अंगलट आल्याची चर्चा आहे. भाजपने रविवारी विधानसभेच्या उमेदवारांची पहिली यादी जाहिर केली. मात्र यात कुमार आयलानी यांना जागा मिळू शकली नाही. या जागेवर आणखी काही नावांचा विचार केला जात असल्याचे बोलले जाते. तसेच भाजपने केलेल्या अंतर्गत सर्वेक्षणातही कुमार आयलानी यांची उल्हासनगरची जागा धोक्यात असल्याचे निष्कर्ष आल्याची माहिती भाजपातील वरिष्ठ सुत्रांनी दिली आहे. त्यामुळे आयलानी यांना पहिल्या यादीत स्थान दिले नसल्याचे बोलले जाते.
कलानींच्या दावेदारीने भाजप संभ्रमात
उल्हासनगर मतदारसंघावर कलानी कुटुंबियांचा मोठा प्रभाव असतो. त्यातही कुमार आयलानी दोन विधानसभा निवडणुकांमध्ये निवडून आले. मात्र त्यातही २०१४, २००४ या निवडणुकांत आयलानी यांना पराभवाचा सामना करावा लागला. यंदा सुरेश उर्फ पप्पू कलानी, ओमी कलानी एकाच वेळी निवडणुकांसाठी सज्ज आहेत. ओमी कलानी निवडणून लढण्याची शक्यता आहे. पप्पू कलानी प्रचाराची धुरा सांभाळण्याची शक्यता आहे. त्यामुळे यंदा भाजपला येथे मोठा संघर्ष करावा लागणार असल्याचे बोलले जाते. त्यामुळे कलानी यांच्या तुलनेत चांगली प्रतिमा आणि नवा चेहरा द्यायचा का यावरही भाजपाच चर्चा होत असल्याची माहिती आहे.
