भाजपाचे सरकार अवघ्या चार महिन्यांतच अडचणीत? पश्चिम बंगालमध्ये संघ परिवाराची चिंता का वाढली?

नामांतराच्या मागणीवरून भाजपाची कोंडी

श्री अरविंदो यांचे या संस्थेशी असलेले नाते आणि संस्थापक सदस्य म्हणून असलेली त्यांची भूमिका लक्षात घेऊन हे नाव देण्यात यावे, असा युक्तिवाद शर्वरी मुखर्जी केला. विशेष बाब म्हणजे, सध्या भाजपा सरकार राज्यातील संस्था किंवा सार्वजनिक ठिकाणांची नावे बदलण्यासारख्या मुद्द्यांपेक्षा विकास आण सुशासन हेच आपले मुख्य उद्दिष्ट असल्याचे सांगत आहे. अशा परिस्थितीत पक्षाच्याच आमदाराने केलेल्या या मागणीमुळे सरकारची चांगलीच कोंडी झाली आहे. त्यातच अलीकडेच भाजपाचे कथित समर्थक असलेल्या काही व्यक्तींनी कोलकात्यातील एका प्रमुख दैनिकाच्या कार्यालयाबाहेर निदर्शने केली. यावेळी कार्यालयाच्या पांढऱ्या रंगाच्या इमारतीच्या काही भाग भगव्या रंगाने रंगवून टाकण्यात आला. या घटनेमुळे राज्यात नवा राजकीय वाद निर्माण झाला असून सरकारवर चौफेर टीका होत आहे.

तोडफोड प्रकरणापासून भाजपाने झटकले हात

कोलकात्यातील वृत्तपत्राच्या कार्यालयाबाहेर झालेल्या तोडफोडीच्या घटनेपासून भाजपा आणि राज्य सरकारने स्वतःला दूर ठेवण्याचा प्रयत्न केला. भाजपाचे प्रदेशाध्यक्ष सामिक भट्टाचार्य यांनी या घटनेचा पक्षाशी किंवा सरकारशी कोणताही संबंध नसल्याचे स्पष्ट केले. माध्यमांशी संवाद साधताना भट्टाचार्य म्हणाले की, मी एका विशिष्ट राजकीय पक्षाचे प्रतिनिधित्व करत आहे. बंगालमधील जनतेने बदलासाठी मतदान केले आहे. कोणत्याही विशिष्ट जागेचा रंग बदलणे हे या सरकारचे ध्येय नाही. अलीकडच्या काळात राज्यात काही वाद निर्माण झाले असून काहींनी वृत्तपत्राच्या कार्यालयाचा रंग बदलला, मात्र आमचा त्यांच्याशी कोणताही संबंध नसून हा पक्षाचा किंवा सरकारचा अजेंडा नाही. राज्याचा विकास करणे हेच आमचे खरे ध्येय आहे आणि त्यासाठी सरकार सर्वतोपरी काम करण्यास तयार आहे.

विद्यापीठाच्या नामांतराची मागणीही फेटाळली

पुढे भूमिका आणखी स्पष्ट करत भट्टाचार्य म्हणाले की, वृत्तपत्र कार्यालयाचा रंग बदलणारे लोक भाजपाचे कार्यकर्ते नाहीत. या संपूर्ण प्रकरणाशी आमच्या पक्षाचा कोणताही संबंध नाही. याशिवाय जादवपूर विद्यापीठाचे नाव बदलण्याबाबत भाजपा आमदार शारबरी मुखर्जी यांनी केलेली मागणीही भट्टाचार्य यांनी फेटाळून लावली. हा आमच्या पक्षाचा अजेंडा नाही. आमदारांनी व्यक्त केलेले मत हे त्यांचे वैयक्तिक मत आहे, असे भट्टाचार्य यांनी सांगितले. विधानसभा निवडणुकीतील ऐतिहासिक विजयानंतर भाजपाचा राज्यात अत्यंत झपाट्याने विस्तार झाला. त्यानंतरच्या काही दिवसांतच पक्षांतर्गत शिस्त आणि कारभाराबाबत संघ परिवारातील काही नेत्यांनी चिंता व्यक्त केली. त्यातच निर्माण झालेल्या ताज्या वादापासून भाजपा स्वत:ला दूर ठेवण्याचा प्रयत्न करत असल्याचे स्पष्टपणे दिसत आहे.

आरएसएसच्या साप्ताहिकातून भाजपाला इशारा

राष्ट्रीय स्वयंसेवक संघाशी संबंधित बंगाली साप्ताहिक स्वस्तिकाने आपल्या ताज्या लेखातून भाजपाला सावधानतेचा इशारा दिला आहे. काही गुंड प्रवृत्तीचे लोक पक्षात प्रवेश करत असल्याचा उल्लेख करताना साप्ताहिकाने पक्षाच्या वाढत्या विस्ताराबाबत चिंता व्यक्त केली आहे. भाजपासमोरील सर्वात मोठे आव्हान आता केवळ राजकीय विरोधकांना पराभूत करणे राहिलेले नाही, तर जनतेच्या अपेक्षा पूर्ण करणे हे असल्याचे लेखात नमूद करण्यात आले आहे. भाजपाशी थेट लढू शकेल असा कोणताही विरोधी पक्ष सध्या मैदानात शिल्लक नाही… खरी कसोटी आणि दबाव हा जनतेच्या अपेक्षांना सामोरे जाण्याचा आहे, असे या लेखात नमूद करण्यात आले आहे. बंगालच्या मतदारांनी ज्या राजकीय संस्कृतीला नाकारले, भाजपाही त्याच संस्कृतीची सावली वाटू लागल्यास पक्षाचा जनाधार वेगाने कमी होऊ शकतो. जर दोन टक्के मतदारांच्या मनात गैरसमज निर्माण झाल्यास पुढे ९० टक्के लोकही भाजपापासून दूर जातील, असा इशाराही लेखातून देण्यात आला आहे.

“भाजपाचा जनाधार वेगाने ढासाळू शकतो”

बंगालच्या जनतेने एकदा नाकारलेला पक्ष पुन्हा कधीही सत्तेवर येऊ शकलेला नाही. राज्यात १५ वर्ष सत्तेत असलेले तृणमूल काँग्रेसचे भ्रष्ट सरकार जनतेने पूर्णपणे उद्ध्वस्त केले आहे. दुसरीकडे- डाव्यांची आघाडी आणि काँग्रेसला फक्त नाममात्र जनधार उरला आहे, असेही लेखात नमूद करण्यात आले आहे. दरम्यान, पक्षाच्या झपाट्याने झालेल्या विस्तारामुळे संघटनात्मक पातळीवर अनेक आव्हाने उभी राहिल्याची कबुली भाजपच्या एका वरिष्ठ नेत्याने नाव न सांगण्याच्या अटीवर दिली. “जनतेने आम्हाला मतदान केले म्हणून आम्ही सत्तेत आलो. मात्र, सर्व क्षेत्रांमध्ये आणि भागांमध्ये आमची अद्याप सक्षम संघटनात्मक रचना नाही. आता मोठ्या संख्येने लोक पक्षात प्रवेश करत आहेत. त्यांना भाजपा आणि संघाच्या कार्यपद्धतीची माहिती नाही. पक्षाबाहेरून आलेल्या काहींना वाटते की तृणमूल काँग्रेस जे करत होती, तसेच आपणही करायचे; तर काहीजण की केवळ इमारतींचा रंग बदलून किंवा वादग्रस्त विधाने करून आपण पक्ष नेतृत्वाला खूश करण्याचा प्रयत्न करत आहेत”, असेही या नेत्याने सांगितले.

विरोधकांकडून भाजपावर टीकेची धार

कोलकात्यातील तोडफोडीच्या घटनेपासून भाजपाला दूर ठेवण्याचा प्रदेशाध्यक्ष सामिक भट्टाचार्य यांचा प्रयत्न विरोधकांनी साफ फेटाळून लावला आहे. या मुद्द्यावरून त्यांनी भाजपावर टीकेची धार अधिक तीव्र केली आहे. या घटनेवरून मार्क्सवादी कम्युनिस्ट पक्षाच्या केंद्रीय समितीचे सदस्य सुजन चक्रवर्ती यांनी भाजपावर गंभीर आरोप केला आहे. कोलकात्यातील वृत्तपत्राच्या कार्यालयाबाहेर तोडफोड करणारे काहीजण भाजपातीलच आहे. सत्ताधारी पक्षात अनेक प्रकारचे मुखवटे पाहायला मिळतात. भाजपाचे कार्यकर्ते स्वतःच्या प्रदेशाध्यक्षांचे बोलणेही गांभीर्याने घेत नाहीत आणि त्यांना जे करायचे आहे तेच करत आहेत, असे त्यांनी म्हटले आहे. दरम्यान, माजी मुख्यमंत्री ममता बॅनर्जी यांच्या नेतृत्वाखालील गटाशी संबंधित तृणमूल काँग्रेसचे आमदार कुणाल घोष यांनीही या वादांवरून भाजपावर जोरदार हल्लाबोल केला. भाजपामध्ये केवळ संस्थांची नावे बदलणे, इमारतींचे रंग बदलणे, पोलिसांची भीती दाखवून धमकावणे आणि पक्षांतरे घडवून आणणे एवढाच कारभार चालतो, अशी टीका त्यांनी केली आहे. त्यामुळे विरोधकांचा आक्रमक पवित्रा आणि पक्षांतर्गत निर्माण झालेल्या मतभेदाला भाजपा सरकार कसे सामोरे जाणार हे पाहणे महत्वाचे ठरणार आहे.