पुण्यात एका अल्पवयीन मुलीवर भावाला जीवे मारुन टाकेन अशी धमकी देत लैंगिक अत्याचार करण्यात आल्याची धक्कादायक घटना घडली आहे. विश्रांतवाडी भागात ही घटना घडली आहे. पोलिसांनी याप्रकरणी गुन्हा दाखल केला असून आरोपीला अटक केली आहे. तू माझ्याशी का बोलत नाहीस ? मी सांगेन तसे तू न केल्यास तुझ्या भावाला मारून टाकेन अशी धमकी आरोपी पीडित मुलीला देत होता. पीडित मुलगी अल्पवयीन असून आठवीत शिकत आहे. तक्रार दाखल झाल्यानंतर काही वेळातच पोलिसांनी कारवाई करत आरोपीला अटक केली. पोलिसांनी दिलेल्या माहितीनुसार, पीडित मुलगी आठवीत शिकत असून आपल्या आई, वडील आणि भावासोबत राहते. मुलीचे आई, वडील बुधवारी कामावर गेले होते. मुलगी शाळेत जाण्यास निघाली असता रस्त्यात आरोपी धनंजय मारमिलले याने तिला अडवले. तू माझ्याशी का बोलत नाहीस? मी सांगेन तसे तू न केल्यास तुझ्या भावाला मारून टाकेन अशी धमकी त्याने देण्यास सुरुवात केली. यानंतर आरोपीने मुलीवर जबरदस्ती करत घरी नेले. यावेळी त्याने तिच्यावर लैंगिक अत्याचार केला आणि तेथून पळून गेला. बराच वेळा मुलगी घरी न आल्याने पीडित मुलीच्या आईने तिला शोधण्यास सुरुवात केली. मुलगी सापडली असता आईने विश्वासात घेऊन काय झाले याबाबत विचारले असता तिने घडलेला प्रकार सांगितला. पीडित मुलीच्या वडिलांनी तक्रार केल्यानंतर पोलिसांनी गुन्हा दाखल करुन घेतला. तसंच काही तासात आरोपीला अटक करण्यात आली.
