मुंबई-पुणे द्रुतगती मार्गावर पुण्याच्या दिशेने येणाऱ्या भरधाव कारने अज्ञात वाहनाला मागून धडक दिल्याने झालेल्या अपघातात कारमधील एक ठार तर तिघे जखमी झाले आहेत. ही घटना शनिवारी पहाटे तीनच्या सुमारास घडली. संजय नारायण दाऊतपुरे अस मृत व्यक्तीचे नाव आहे. पोलिसांनी दिलेल्या माहितीनुसार, मुंबईहून पुण्याच्या दिशेने येताना किवळे पुलावर किलोमीटर क्रमांक ९०० येथे भरधाव कारने (एमएच १४ सीएक्स ९०२१) एका अज्ञात वाहनाला मागून धडक दिली. यात कारमधील एकाचा मृत्यू तर तिघे जखमी झाले. मृत संजय दाऊतपुरे हे मुळचे अमरावतीचे आहेत. भीमराव मस्के, मनोज बंडगर, सचिन साठे अशी जखमींची नावे असून हे सर्वजण पिंपरी-चिंचवड येथील काळेवाडीत राहत होते. चौघे मित्र असून ते मुंबईकडे गेले होते. कारवरील नियंत्रण सुटल्याने हा अपघात झाल्याचा प्राथमिक अंदाज पोलिसांनी वर्तवला आहे. अपघाताची माहिती मिळताच पोलिसांनी घटनास्थळी धाव घेतली. याप्रकरणी पोलिसांकडून तपास सुरू आहे.
