संगणक अभियंता महिलेने स्वत:च्या पाच वर्षे वयाच्या मुलाच्या हाताच्या नसा कापून व गळा दाबून खून केल्यानंतर स्वत: इमारतीच्या तिसऱ्या मजल्यावरून उडी मारून आत्महत्या केली. सिंहगड रस्त्यावरील माणिकबाग परिसरातील निखिल गार्डन सोसायटीमध्ये रविवारी सकाळी अकराच्या सुमारास ही घटना घडली. पत्नी व मुलाच्या मृत्यूमुळे प्रचंड धक्का बसल्याने महिलेचा पती अत्यवस्थ झाल्याने त्याला रुग्णालयात दाखल करण्यात आले आहे. आत्महत्येपूर्वी महिलेने लिहिलेली चिठ्ठी पोलिसांना मिळाली असून, कौटुंबिक वादातून आलेल्या निराशेतून तिने हे कृत्य केले असल्याची शक्यता व्यक्त करण्यात येत आहे. अर्णव तेजस मोरे, असे खून झालेल्या मुलाचे नाव आहे. त्याची आई दीप्ती तेजस मोरे (वय ३४) हिने आत्महत्या केली आहे. मोरे कुटुंब निखिल गार्डन सोसायटीतील ‘ए’ इमारतीत तिसऱ्या मजल्यावर राहते. पोलिसांनी दिलेल्या माहितीनुसार, दीप्ती व तेजस मोरे हे दोघेही संगणक अभियंता आहेत. मात्र, दीप्तीने सहा महिन्यांपूर्वी माहिती-तंत्रज्ञान क्षेत्रातील नोकरी सोडली होती. तेव्हापासून ती नैराश्यात होती.
