पिंपरी-चिंचवडमध्ये आईने तीन मुलांना गळफास देऊन स्वतः आत्महत्या केल्याची खळबळ जनक घटना रविवारी घडली होती. मात्र, आता या घटनेने वेगळे वळण घेतले असून या घटनेतील मृत दोन्ही मुलींवर लैंगिक अत्याचार झाल्याची धक्कादायक बाब शवविच्छेदन अहवालात समोर आली आहे. याप्रकरणी एका नातेवाईकास भोसरी पोलिसांनी ताब्यात घेतले आहे. तर मृत आईवर संशयावरून खुनाचा गुन्हा भोसरी पोलिसांनी दाखल केला असल्याची माहिती राम जाधव (सहायक पोलीस आयुक्त) यांनी दिली आहे. #UPDATE Medical reports confirm that the two girls (aged 9 and 7 years) were rape victims. Case registered. One accused has been arrested. Investigation still underway. — ANI (@ANI) July 29, 2019 पोलिसांनी दिलेल्या माहितीनुसार, रविवारी भोसरीमध्ये तीन मुलांना फाशी देऊन स्वतः जन्मदात्या आईने गळफास घेऊन आत्महत्या केल्याची धक्कादायक घटना घडली होती. या घटनेने पिंपरी-चिंचवड शहरात खळबळ माजली होती. मृत महिलेच्या पतीचा फळ विक्रीचा व्यवसाय असून त्यांना यामध्ये नेहमी तोटा सहन करावा लागत होता. यातून त्यांचे अनेकदा किरकोळ वादही झाले. रविवारी पती बाहेर गेल्यानंतर २८ वर्षीय महिलेने मुलांना गळफास देऊन त्यांना मारले व त्यानंतर स्वतः गळफास घेऊन आपली जीवनयात्रा संपवली होती. दरम्यान, आईनेच मुलांना मारले आहे का? असा प्रश्न उपस्थित झाला असून, याबाबत भोसरी पोलीस तपास करत आहेत. मृत आईवर संशयावरून खुनाचा गुन्हा दाखल करण्यात आला असून मुलींवर लैंगिक अत्याचार केल्याप्रकरणी एका संशयीत नातेवाईकास ताब्यात घेतले आहे. घटनेचा अधिक तपास वरिष्ठ पोलीस निरीक्षक शंकर अवताडे करत आहेत.