पिंपरीतील खेड मांजरेवाडी भागात एका तरुणाला वाढदिवस साजरा करणे चांगलेच महागात पडले आहे. सैराट या सिनेमात दाखवल्याप्रमाणे ओमकार टाकळकर या २२ वर्षांच्या तरुणाने वाढदिवस साजरा करताना तलवारीने केक कापला. याचे फोटो त्याच्या मित्रांनी मोबाइलमध्ये काढले. त्यानंतर हे फोटो व्हॉट्स अॅप आणि फेसबुकच्या माध्यमातून व्हायरल झाले. खेड मांजरेवाडीचे पोलीस पाटील प्रमोद मांजरे यांनीही हे फोटो पाहिले. तलवारीने केक कापतानाचे फोटो पाहिल्यानंतर पोलीस पाटील प्रमोद मांजरे यांनी खेड पोलीस ठाण्यात यासंबंधीची तक्रार नोंदवली. ओमकार टाकळकर, नंदकुमार मांजरे, अक्षय मांजरे, गणपत मैराळे, स्वप्नील मांजरे, बाळासाहेब मांजरे या तरुणांवर शस्त्र बाळगल्याप्रकरणी गुन्हा दाखल करण्यात आला. पोलिसांनी या प्रकरणी अद्याप कुणालाही अटक केलेली नाही अशीही माहिती समोर येते आहे. या प्रकरणाचा तपास पोलीस उपनिरीक्षक लोणीकर यांच्याकडे देण्यात आला आहे.