मुंबई-पुणे द्रुतगती महामार्गावरच्या अमृतांजन पुलाजवळ असलेल्या उतारावर एका भरधाव कंटनेरने तीन वाहनांना धडक दिली. या धडकेत एक चालक जखमी झाल्याची माहिती समोर आली आहे. सकाळी ९.१५ च्या सुमारास हा अपघात झाला. कंटनेरचा चालक साधारण अर्धा तास गाडीत अडकला होता. अपघाताची माहिती मिळताच खंडाळा महामार्ग पोलीस आणि आयआरबी व देवदूत पथक यांनी घटनास्थळी धाव घेतली. जखमी चालकाला गाडीतून बाहेर काढण्यात आले. अपघातग्रस्त वाहने बाजूला करण्यात आली. या अपघातामुळे काही वेळासाठी मुंबईकडे जाणारी वाहतूक विस्कळीत झाली होती. जी नंतर सुरळीत झाली असेही समजले आहे. पुण्याहून मुंबईच्या दिशेने कंटेनर चालला होता. त्याचवेळी कंटेनर चालकाचा ताबा सुटला ज्यामुळे त्याने समोर असलेल्या इनोव्हाला धडक दिली. इनोव्हा तिच्या समोर असलेल्या बीएमडब्ल्युला धडकली. त्यानंतर हा कंटनेर आणखी एका कंटेनरला धडकला. ज्यामुळे हा विचित्र अपघात झाला.
