पुण्यात दिवसभरात २९३ नवे करोनाबाधित रुग्ण आढळून आले तर ११ रुग्णांचा मृत्यू झाला आहे. तसेच पिंपरी-चिंचवडमध्ये दिवसभरात ९२ रुग्ण आढळून आले असून दोन करोनाबाधित रुग्णांचा मृत्यू झाला. यामुळे पुण्यातील करोनाबाधितांची एकूण संख्या १०,१८३ एवढी झाली, तर पिंपरी-चिंचवडमधील एकूण संख्या १,३३० वर पोहोचली आहे. पुणे शहरात आज अखेर ४६९ रुग्णांचा मृत्यू झाला आहे. करोनावर उपचार घेणार्‍या १५० रुग्णांची पुन्हा टेस्ट घेण्यात आली. त्या सर्वांचा रिपोर्ट निगेटिव्ह आल्याने, त्या सर्वांना घरी सोडण्यात आले आहे. त्यामुळे आज अखेर ६ हजार ५६९ रुग्ण करोनामुक्त झाले आहेत. पिंपरी-चिंचवडमध्ये लोणावळा आणि दापोडी येथील रुग्ण महापालिकेच्या रुग्णालयात उपचार घेत होते त्यांचा आज उपचारादरम्यान दुर्दैवी मृत्यू झाला. दरम्यान, आज शहरातील ५७ जण करोनामुक्त झालेले आहेत. पिंपरी-चिंचवड शहरातील बाधितांची एकूण संख्या १,३३० वर पोहचली असून आत्तापर्यंत साडेआठशे जणांना डिस्चार्ज देण्यात आला आहे.
