पुण्यातील आकुर्डी रेल्वेस्थानकाजवळ रेल्वे अपघातात एका महिलेचा मृत्यू झाला. रूळ ओलांडताना एक्स्प्रेसखाली आल्याने हा अपघात झाला. ही घटना मंगळवारी सकाळच्या सुमारास घडली. अद्याप महिलेची ओळख पटलेली नाही. रेल्वे पोलिसांनी दिलेल्या माहितीनुसार, आकुर्डी रेल्वेस्थानकाजवळ विशाखापट्टणम एक्स्प्रेस पुण्याच्या दिशेने जात होती. त्याचवेळी एक ४० वर्षीय महिलेला रूळ ओलांडताना एक्स्प्रेसची धडक बसली. यात ही महिला जागीच ठार झाली. ही घटना सकाळी १०.१५ च्या सुमारास घडली. महिलेची ओळख अद्याप पटलेली नाही. महिलेच्या अंगावर गुलाबी साडी, काळ्या रंगाचा ब्लाऊज, उंची पाच फूट, वर्ण सावळा असे वर्णन आहे. रेल्वे पोलीस अधिक तपास करत आहेत.