पुण्याच्या भोसरी भागात इमारतीच्या पाण्याच्या टाकीत पडल्याने एका वृद्धेचा मृत्यू झाला आहे. चंद्रप्रभा अंबादास आंबडेकर (वय ६५) अस मृत्यू झालेल्या वृद्ध महिलेचे नाव आहे. या प्रकरणाचा अधिक तपास भोसरी पोलीस करत आहेत. मिळालेल्या माहितीनुसार, आंबडेकर भोसरीतील पोटे वसाहत याठिकाणी राहत होत्या. राहत्या इमारतीत त्या दररोज सकाळी आणि संध्याकाळी जिन्याच्या खालील टाकीचा कॉक बंद करण्याचे काम करायच्या. त्याचप्रमाणे त्या बुधवारी सकाळी कॉक बंद करण्यासाठी गेल्या. यावेळी तोल जाऊन त्या टाकीत पडल्या आणि त्यांचा मृत्यू झाला. घरातील व्यक्तींना चंद्रप्रभा बराच वेळ झाला तरी घरी न आल्याने संशय आला. त्यांना शोधण्यासाठी बाहेर आले असता चंद्रभागा यांची चप्पल त्याच ठिकाणी पडली होती. तसेच टाकीचे झाकण उघडे असल्याने घरच्यांना संशय आला आणि चंद्रप्रभा यांचा टाकीत पडून मृत्यू झाल्याचे लक्षात आले. अशाप्रकारे टाकीत पडून मृत्यू झाल्याच्या घटना कायम घडत असतात. त्यामुळे नागरिकांनी विशेष काळजी घ्यायला हवी.
