'ज्योत से ज्योत जगाते चलो' या गीताची प्रचिती देत त्रिपुरारी पौर्णिमनिमित्त सोमवारी (दि. १४) हजारो पणत्या प्रज्वलित करून पांडवकालीन लेणी असलेल्या पुणे येथील पाताळेश्वर मंदिरात दीपोत्सव साजरा करण्यात आला. ब्रिगेडियर (निवृत्त) प्रसाद जोशी यांनी पहिला दीप प्रज्वलित केला आणि देशासाठी हौतात्म्य पत्करलेल्या जवानांना या दीपोत्सवाच्या माध्यमातून अभिवादन करण्यात आले. या दीपोत्सवामध्ये सहभाग घेण्यासाठी आणि पणत्यांच्या प्रकाशात उजळून निघालेले पाताळेश्वर मंदिर पाहण्यासाठी नागरिकांनी गर्दी केली होती. पाताळेश्वर उत्सव समितीतर्फे या दीपोत्सवाचे आयोजन करण्यात आले होते. (छायाचित्र: तन्मय ठोंबरे)