पिंपरी-चिंचवडमधील भाजपा आमदार महेश लांडगे यांनी करोना नियमांचं उल्लंघन केल्याचं आज माध्यमांद्वारे समोर आल्यानंतर, सर्वसामान्य जनतेत याप्रकरणी पोलीस आता काय कारवाई करतील? नियम फक्त सर्वसामान्यांनाच लागू आहेत का? नेते मंडळींना सर्व काही माफ आहे का? असे विविध प्रश्न चर्चिले जात होते. अखेर सर्वसामान्यांच्या या प्रश्नाला पोलीस प्रशासनाकडून करण्यात आलेल्या कारवाईवरून उत्तर मिळालं आहे. भाजपा आमदार महेश लांडगे यांच्यासह ६० जणांविरोधीत करोना नियमांची पायलमल्ली केल्याप्रकरणी गुन्हा दाखल करण्यात आला आहे. करोना नियमांकडे दुर्लक्ष करत आमदार महेश लांडगे यांचा कार्यकर्त्यांसह डान्स! आमदार महेश लांडगे यांच्यासह एकूण ६० जणांवर भोसरी पोलीस ठाण्यात करोना नियमांची पायमल्ली केल्याने १८८, २६९ व महाराष्ट्र पोलीस कायदा कलम ३७(१)(३) सह १३५ नुसार गुन्हा दाखल करण्यात आला आहे. यामध्ये जमावबंदीचे उल्लंघण याप्रकरणी गुन्हा दाखल करण्यात आला आहे. पिंपरी चिंचवडमधील भाजपा आमदार महेश लांडगे यांच्या मुलीचा ६ जून रोजी विवाह असून, त्याअगोदर झालेल्या मांडव सोहळ्यात त्यांनी कार्यकर्त्यांसह वाजंत्रीच्या तालावर डान्स केला. यावेळी, अनेकजण विनामास्क होते व सोशल डिस्टन्सिंगचाही फज्जा उडाला होता.#Maharashtra #PimpriChinchwad #COVID19 pic.twitter.com/o7sSwoXkDt — LoksattaLive (@LoksattaLive) May 31, 2021 आमदार महेश लांडगे यांच्या मुलीचा ६ जून रोजी विवाह सोहळा असून, त्यापूर्वी काल (रविवारी) झालेल्या मांडव सोहळ्यात त्यांनी कार्यकर्त्यांसह भंडारा उधळून डान्स केल्याचा व्हिडिओ समोर आला आहे. तसेच, यावेळी उपस्थित असलेल्या अनेकांनी मास्क देखील लावला नव्हता. कार्यक्रमामध्ये उपस्थित असलेल्या व्यक्तींनी सोशल डिस्टंन्सिंगच्या नियमाकडे दुर्लक्ष करत, गर्दी करत जल्लोष केला. तसेच, यावेळी वाजंत्री, बैल जोड्यांच देखील आयोजन करण्यात आलं होतं.