आधुनिक तंत्रज्ञानाच्या युगात आता शस्त्रक्रियेची पद्धत देखील तितकीच दिवसेंदिवस अत्याधुनिक होत असल्याने शस्त्रक्रिया अधिक सहज झाली आहे. अत्याधुनिक शस्त्रक्रियेच्या क्षेत्रात पुण्याच्या शिरपेचात आज एक मानाचा तुरा खोवला गेला. पुण्यात गुरूवारी रात्री देशातील पहिली गर्भाशय प्रत्यारोपण शस्त्रक्रिया यशस्वी झाली. पुण्यातील गॅलेक्सी केअर रुग्णालयात ही शस्त्रक्रिया करण्यात आली. सोलापूरच्या २१ वर्षीय तरूणीला जन्मत:गर्भाशय नव्हता. त्यामुळे तिच्या आईने तिला गर्भाशय दान करण्याचा निर्णय घेतला. ही शस्त्रक्रिया यशस्वी ठरली असून गर्भाशय प्रत्यारोपण करणारे पुण्यातील गॅलेक्सी केअर रुग्णालय हे देशात पहिलं रुग्णालय ठरलं आहे. ''सोलापूरच्या एका २१ वर्षीय तरूणीला जन्मत: गर्भाशय नाही. याचे निदान यापूर्वीच झाले होते. तरुणीला तिची आई गर्भाशय दान करणार होती. त्यानुसार आज दुपारी १२ वाजता शस्त्रक्रियेला सुरूवात झाली. तब्बल ९ तासांनी शस्त्रक्रिया पूर्ण झाली. सुरुवातीला तरुणीच्या आईचे गर्भाशय दुर्बिनीद्वारे काढण्यात आले. त्यानंतर ते गर्भाशय तरूणीवर प्रत्यारोपण करण्यात आले.'', अशी माहिती डॉ. मिलींद तेलंग यांनी दिली. गर्भाशय काढण्यासाठी ४ तास तर प्रत्यारोपण करण्यासाठी ५ तासांचा कालावधी लागला. तरुणी आणि तिच्या आईची तब्येत चांगली असून तरूणीला पुढील २४ तास डॉक्टरांच्या देखरेखीखाली ठेवण्यात येणार आहे, अशी माहिती त्यांनी दिली.