पुणे : पत्रकार वरुणराज भिडे मित्रमंडळातर्फे ‘लोकसत्ता’चे औरंगाबाद येथील खास प्रतिनिधी सुहास सरदेशमुख यांना यंदाचा वरुणराज भिडे आश्वासक पत्रकारिता पुरस्कार जाहीर झाला आहे. दहा हजार रुपये आणि स्मृतिचिन्ह असे या पुरस्काराचे स्वरूप आहे. मंडळातर्फे ‘महाराष्ट्र टाइम्स’च्या पुणे आवृत्तीचे वरिष्ठ सहसंपादक श्रीधर लोणी यांना वरुणराज भिडे पुरस्कार जाहीर झाला आहे. २५ हजार रुपये आणि स्मृतिचिन्ह असे या पुरस्काराचे स्वरूप आहे. तर सरदेशमुख यांच्यासह ‘दिव्य मराठी’च्या वरिष्ठ बातमीदार जयश्री बोकील आणि ‘न्यूज १८ लोकमत’ वृत्तवाहिनीचे गडचिरोली आणि चंद्रपूर जिल्हा प्रतिनिधी महेश तिवारी यांना वरुणराज भिडे आश्वासक पत्रकारिता पुरस्कार जाहीर झाला आहे. प्रत्येकी दहा हजार रुपये आणि स्मृतिचिन्ह असे या पुरस्काराचे स्वरूप आहे. महाराष्ट्रदिनाचे औचित्य साधून १ मे रोजी एस. एम. जोशी सभागृह येथे सकाळी साडेदहा वाजता होणाऱ्या कार्यक्रमात साहित्य संमेलनाध्यक्ष लक्ष्मीकांत देशमुख यांच्या हस्ते हे पुरस्कार प्रदान करण्यात येणार आहेत. शिवसेना प्रवक्त्या आमदार डॉ. नीलम गोऱ्हे प्रमुख पाहुण्या म्हणून उपस्थित राहणार आहेत. या कार्यक्रमात यशवंतराव चव्हाण प्रतिष्ठानतर्फे सावित्रीबाई फुले पुणे विद्यापीठाच्या वृत्तपत्र पदविका अभ्यासक्रमात ‘चालू घडामोडी’ या विषयामध्ये विशेष प्रावीण्य मिळविलेल्या विद्यार्थ्यांना पारितोषिक प्रदान करण्यात येणार आहे, अशी माहिती वरुणराज भिडे मित्रमंडळाचे प्रा. विलास जोशी यांनी सोमवारी पत्रकार परिषदेत दिली. प्रा. प्रकाश भोंडे, चारुचंद्र भिडे आणि जयराम देसाई या वेळी उपस्थित होते.
